Ақпараттық қауіпсіздік комитетінің төрағасы Bug Bounty бағдарламасының нәтижелерін айтты.

Bug Bounty бағдарламасы Қазақстанда екі жылдан бері жүзеге асырылады. Оның мәні – "ақ хакерлердің" көмегімен Қазақстанда қолданылатын ақпараттық және өзге де жүйелердің осал тұстарын айқындап, оларды жою. Екі жылда бағдарламаға 2200-ден астам зерттеуші қатысса, олар 3 мыңнан астам есебін ұсынған. Бұл туралы Цифрлық даму министрлігі Ақпараттық қауіпсіздік комитетінің төрағасы Руслан Әбдіқалықов Мәскеуде өтіп жатқан Positive hack days фестивалінің аясында журналистердің сұрақтарына жауап беру кезінде айтты.

Маманның айтуынша, бұл тәжірибе әлемде біраз уақыттан бері қолданылғанымен Қазақстан оны заңнама арқылы бекіткен алғашқы елдердің бірі болды.

"Хакерлерді шартты түрде "қара" және "ақ" деп екіге бөлуге болады. Қаралары мемлекеттердің не компаниялардың ақпараттық жүйелеріндегі осал тұстарды анықтап, оны қылмыстық мақсатта не "қара нарықта" сату үшін қолданады. Бірақ, жүйедегі осал тұсты анықтап, оны дұрыстауды қалайтын жандар да жетерлік. Бұлай істесе, бұрын компания иесі оларға не алғыс айтуы мүмкін, не керісінше үстінен арыз жазып, соттатуына да болатын еді. Осыны болдырмас үшін біз заңнамалық тұрғыда Bug Bounty бағдарламасын іске қостық", – деп жауап берді Руслан Әбдіқалықов.

Оқи отырыңыз: Qaztech: Мемлекеттік органдарға арналған бірыңғай платформа қашан іске қосылады

Ол бағдарлама жақсы нәтиже бергенін атап өтті. Жас зерттеушілер тарапынан қызығушылық жоғары. Олар түрлі компанияның коммерциялық жүйелерінен бөлек, мемлекеттік қызметтер көрсету порталының жүйесіндегі ақаулар мен осал тұстарды да анықтап берген.

"Бірақ, мемлекеттік бюджетте қазіргі таңда оларға ақы төлеуге мүмкіндік жоқ. Сондықтан, жобаға қатысқан талантты жастарды жинап, оларды цифрлық даму министрінің атынан алғыс хат және өзге де құрмет белгілерімен марапаттаймыз. Дегенмен, бұл іске бизнес белсенді атсалысуы қажет. Кәсіпкерлер өз жүйесіндегі ақауларды анықтауға және түзеуге көмектескен жастарды ынталандырса, олардың белсенділігі арта түсер еді", – деді Руслан Әбдіқалықов.