24 қарашада Алматы-Бішкек тасжолында алты адамның өмірін жалмаған жантүршігерлік жол апаты болды. Жол-көлік оқиғасы салдарынан тағы бес жолаушы жарақат алған, деп хабарлайды Алматы облыстық ПД-ға сілтеме жасаған KAZ.NUR.KZ.

Оқиға орнынан кадрлар әлеуметтік желіде жарияланды.

Алматы облыстық полиция департаментінің баспасөз қызметінің мәліметінше, жол апаты Алматы-Бішкек автожолының 65-шақырымында болған.

Полиция қызметкерлері жол-көлік оқиғасы фактісі бойынша сотқа дейінгі тергеп-тексеруді бастаған. Алдын ала мәліметтер бойынша, 23 жастағы Audi автокөлігінің жүргізушісі рөлге ие бола алмай, Toyota көлігімен соқтығысқан.

Салдарынан екі жүргізуші мен үш жолаушы оқиға орнында алған жарақаттарынан көз жұмған. Бір жолаушы ауруханаға жеткізілгенімен, дәрігерлер оны аман алып қала алмаған.

Бұдан бөлек, тағы бес жолаушы түрлі дене жарақатын алған, олар дәрігерлердің бақылауында.

"Қазіргі уақытта оқиғаның барлық мән-жайын анықтау мақсатында кешенді тергеу жүргізіліп жатыр. Тергеу барысы Алматы облысы полиция департаменті басшылығының ерекше бақылауында", — делінген хабарламада.

Айта кетейік, бұған дейін Алматы-Бішкек тасжолының 107-ші шақырымында болған жол апатынан сегіз адам қаза тапқан еді.

Ал маусымда болған жол апатынан бес адам көз жұмған болатын.

Қарашаның басында осы тасжолдың 41-шақырымында үш көлік жол апатына ұшырап, бірнеше адам зардап шекті.

Мәтіннен қате тапсаңыз, бізге жазыңыз