Қылмыстық топ 2022-2024 жылдар аралығында мемлекетке жалпы сомасы 42 500 474 теңге мөлшерінде материалдық залал келтірген.

Аса ірі мөлшерде жымқыру дерегін Қызылорда облысы бойынша Экономикалық тергеп-тексеру департаменті анықтап отыр, деп хабарлайды inbusiness.kz сайты.

Тергеу нәтижесінде белгілі болғандай, Қармақшы ауданына қарасты Ақай ауылындағы мектептің бас есепшісі Айнұр Ералиева өзіне сеніп тапсырылған мектеп директорының электрондық цифрлық қолтаңбасымен қызметтік өкілеттігін теріс пайдаланған. Ол мектеп мұғалімдері М.Айжігіт, А.Жарықбаева, Ж.Утепбергенова, А.Нурмуханова, Г.Баймагамбетова, Г.Жомартпен алдын ала сөз байласып, бөтеннің мүлкін аса ірі мөлшерде жымқырған. Оның сыбайласы Айбол Таупиқов қылмысты іске асыру кезінде көмек көрсетіп, жымқырылған қаржыны бөлісу мен жасыруға жәрдемдескен.

– М.Айжігіт, А.Жарықбаева, Ж.Утепбергенова, А.Нурмуханова, Г.Баймагамбетова, Г.Жомарт сияқты бірқатар мұғалім де аталған топтың әрекетіне қатысып, жымқырылған қаражатты өзара бөліскен. Тергеу деректері бойынша, қылмыстық топ 2022-2024 жылдар аралығында мемлекетке жалпы сомасы 42 500 474 теңге мөлшерінде материалдық залал келтірген, – делінген Қызылорда облысы бойыынша Экономикалық тергеп-тексеру департаменті таратқан ақпаратта.

Сот үкімімен Айнұр Ералиева ҚР Қылмыстық кодексінің 189-бабының 4-бөлігінің 2) тармағы бойынша кінәлі деп танылып, 7 жыл мерзімге бас бостандығынан айыру жазасына кесілді.

Алайда сот ҚК-нің 74-бабының 1-бөлігіне сәйкес, сотталушының кәмелетке толмаған баласы он төрт жасқа дейін жетпегеніне байланысты жазаның орындалуын 5 жыл мерзімге кейінге қалдырды.

Сонымен қатар, ол қаржы және бухгалтерлік есеп саласында жұмыс істеу құқығынан 10 жыл мерзімге айырылды. Жазасын қылмыстық атқару жүйесінің орташа қауіпсіздік мекемесінде өтейді.

Айбол Таупиқовқа ҚК-нің 63-бабы қолданылып, 7 жыл мерзімге шартты жаза тағайындалды. Қалған алты мұғалімнің әрқайсысына 2 жылдан 2 жыл 4 айға дейін бас бостандығын шектеу жазасы белгіленді. Аталған іс бойынша мемлекетке келтірілген залал сотталушылардан өндіріледі.