Құжатта бірқатар нормалар бар.

Сенаттың жалпы отырысында Қазақстан мен Оман Сұлтандығының Үкіметтері арасындағы табыс пен капиталға салынатын салықтарға қатысты қосарланған салық салуды болдырмау және салық салудан жалтаруға жол бермеу туралы келісімді және оған хаттаманы ратификациялау туралы заң мақұлданды, деп хабарлайды inbusiness.kz сайты.

Келісімге 2025 жылғы 29 мамырда Астана қаласында қол қойылды және 2025 жылғы 4 қыркүйекте Оман Сұлтандығында келісім ратификацияланды. Келісімнің басты мақсаты – кәсіпкерлер мен инвесторлардың бір табысқа екі мемлекетте қатар салық төлеуіне жол бермеу. Бүгінле мұндай келісімдерге Қытай, Ұлыбритания, Канада, АҚШ, Германия сияқты 55 мемлекеттерімен қол қойылған.

"Соңғы жылдары екі ел арасындағы сауда айналымы да, инвестициялық байланыстар да тұрақты түрде дамып келеді. Оман мемлекетімен арада соңғы он жылдың ішінде бізде 27 миллион долларға жуық тауар айналымы болды. Оның ішінде тауар айналымдағы импорт 18 миллион долларды құрайды, ал экспорт 9 миллион долларға жуық. Қазіргі таңда біздің мемлекетте Оман капиталымен жеті мекеме тіркелген, оның алтауы тұрақты жұмыс жасауда. Ал Оман мемлекетінде біздің кәсіпкерлер әлі жұмыстарын жүргізген жоқ", – деді сенатор Сұлтанбек Мәкежанов.

Жалпы келісім 33 баптан тұрады. Келісімнің 2-бабының 3-тармағына сәйкес, оның Қазақстан Республикасында қолданылуы салықтың үш түріне-корпоративтік табыс салығына, жеке табыс салығына, заңды және жеке тұлғалардың мүлкіне салынатын салыққа қолданылады. Оманда мүліктік және жеке табыс салығы болмағандықтан, табыс салығына байланысты қолданылады. Сонымен бірге, Келісімнің 21-бабына сәйкес, оқытушылар мен ғалымдардың сыйақысы қабылдаушы елде үш жылға дейін салықтан босатылады.

Сенатордың сөзінше, келісім бірқатар мәселелерді реттейді:

- салық салу мақсатында резиденттікті анықтау;
— тұрақты мекеме құру;
— салық салуға жататын табысты бөлу (дивидендтер, пайыздар, роялти, кәсіпкерлік қызметтен түсетін табыс және т.б.);
— салықтық ақпарат алмасу тәртібі;
— жеңілдіктерді шектеу туралы баптар.

Құжат инвестициялық ахуалды жақсартуға, шетелдік капитал мен технология тартуға, кәсіпкерлер үшін түсінікті әрі тұрақты салықтық орта қалыптастыруға бағытталған.