Биылғы тізімде Еуропа елдері басымдық танытып отыр.

Алғашқы бестікке тек бір ғана еуропалық емес мемлекет енген, деп хабарлайды inbusiness.kz сайты.

2026 жылғы иммиграция индексін жасаған Remitly компаниясы әлемнің 82 елін 34 түрлі көрсеткіш бойынша саралады. Зерттеу барысында елдердің өмір сүру құны, азық-түлік бағасы, жалдамалы баспана, ипотека, сатып алу қабілеті, қауіпсіздік деңгейі, денсаулық сақтау жүйесі, білім сапасы және тұрғындардың бақыт индексі ескерілген.

Биыл рейтингтің бірінші сатысына Швейцария жайғасты. Өткен жылы екінші орында болған мемлекет бұл жолы жоғары табыс табу мүмкіндігімен, сапалы медицинамен және қауіпсіздік деңгейінің жоғарылығымен ерекшеленген. Сарапшылардың айтуынша, дәл осы үш фактор елді көшіп баруға ең тартымды бағыттардың біріне айналдырып отыр.

Екінші орын Исландияға бұйырды. Бұл ел де қауіпсіздігімен, экологиялық тазалығымен және табыс деңгейімен жоғары бағаланған. Десе де, халықаралық мектептер санының азаюы рейтингтегі позициясына әсер еткен.

Ал үздік үштікті Люксембург түйіндеді. Кішкентай болғанымен, бұл мемлекет жоғары жалақы, дамыған қоғамдық көлік және тұрақты экономикасымен көзге түсіп отыр. Сарапшылар оны "Еуропаның қақ ортасындағы жайлы әрі тұрақты өмірдің символы" деп сипаттайды.

Төртінші орынға Аустралия орналасты. Бұл – алғашқы бестіктегі жалғыз еуропалық емес мемлекет. Елдің рейтингте жоғарылауына иммигранттарға қолайлы орта, жақсы табыс табу мүмкіндігі және табиғатпен үндес өмір салты әсер еткен.

Ал Германия үздік бестікті қорытындылады. Remitly сарапшылары бұл елді мықты экономикасы, еңбек құқықтарының қорғалуы және ұзақмерзімді мансаптық мүмкіндіктері үшін жоғары бағалаған. Сонымен қатар, Германияда Еуропадағы қолжетімді жылжымайтын мүлік нарығы бар қалалар да аз емес.

Қоныс аударуға ең қолайлы ТОП-10 ел:

1. Швейцария
2. Исландия
3. Люксембург
4. Аустралия
5. Германия
6. Ирландия
7. АҚШ
8. Дания
9. Норвегия
10. Испания

Соңғы жылдары әлемде "Қай елде өмір сапасы жоғары?" деген сұрақ бұрынғыдан да өзекті бола түсті. Әсіресе, қауіпсіздік, тұрақты табыс пен әлеуметтік жағдайға мән беретін адамдар үшін мұндай рейтингтердің маңызы артып келеді.