Қазақстанда жеке тұрғын үйлердің барлық тұрғын үй-жайлары автономды оптикалық-электрондық түтін өрт хабарлағыштарымен міндетті түрде жарақтандырылуы тиіс. Бұл туралы Төтенше жағдайлар министрлігінің баспасөз қызметіне сілтеме жасаған KAZ.NUR.KZ хабарлайды.

Министрліктің хабарлауынша, өрт қауіпсіздігі қағидаларына енгізілген өзгерістер ағымдағы жылдың 10 маусымында күшіне енген.

"Осы норманы енгізу өртті уақтылы анықтауға, адам өлімінің алдын алуға және материалдық залалды азайтуға бағытталған. Қауіпсіздік шараларын, соның ішінде түтін датчиктерін сатып алу мен орнатуды қамтамасыз ету үшін жауапкершілік тұрғын үйдің иесіне жүктелетінін атап өткен жөн", — делінген ресми хабарламада.

Ведомство ақпаратына сәйкес, ТЖМ әкімдіктермен және волонтёрлермен бірлесіп, әлеуметтік осал топтардың тұрғын үйлеріне газдың қауіпті концентрациясы мен жану өнімдерін анықтайтын датчиктерді орнату жұмыстарын жүргізуде. Биыл 31 мыңнан астам датчик орнатылған.

Көппәтерлі тұрғын үйлердің жағдайы не болмақ?

"Жаңа көппәтерлі тұрғын үйлерге қатысты өрт дабылы жүйесін орнату Мемлекеттік құрылыс нормаларында қарастырылған. ТЖМ бастамасы бойынша архитектура, қала құрылысы және құрылыс саласындағы нормативтерге өзгерістер енгізілген", — деп хабарлады министрлік өкілдері.

Енді жаңадан жобаланатын барлық көпқабатты үйлерде, қабат санына қарамастан, міндетті түрде:

- автоматты өрт дабылы жүйелері;

- табиғи газды пайдаланатын өңірлердегі үйлер үшін газдану деңгейін бақылау жүйелері қарастырылатын болады.

ТЖМ өкілдері тұрғын үй иелері мен пайдаланушыларын өрт қауіпсіздігі талаптарын сақтау әркімнің міндеті екенін еске салды.

"Әкімшілік құқық бұзушылық туралы кодексінің 410-бабына сәйкес, өрт қауіпсіздігі талаптарын бұзу әкімшілік жауапкершілікке әкеп соғады. Министрлік азаматтарды жеке және қоғамдық қауіпсіздік мәселелеріне жауапкершілікпен қарауға, үйлерін өрт қорғау құралдарымен уақтылы жарақтандыруға және өрт қауіпсіздігі нормаларын қатаң сақтауға шақырады", — делінген хабарламада.

Мәтіннен қате тапсаңыз, бізге жазыңыз