Еңбек қазақ және орыс тілдерінде баспадан шықты.

Алматыда қазақстандық жазушы Әблимит Рахматулаевтың балалардың қаржылық сауатын арттыруға арналған "Жолбарыстың Ұлы Жібек жолындағы қызықты және тәлімді шытырман оқиғалары" кітабының тұсауы кесілді. Еңбек қазақ тілінде жазылып, орыс тіліне аударылған. Осылайша, екі тілде жарыққа шыққан кітап ел мектептері мен кітапханаларына тегін таратылады.

Жаңа еңбектің жарық көруіне "Freedom Life" өмірді сақтандыру компаниясы мен Қаржы нарығын реттеу және дамыту агенттігінің FinGramota.kz жобасы қолдау көрсетті. Шығарманың басты кейіпкері – Жолбарыс есімді бала, ол Ұлы Жібек Жолы дәуіріне сапар шегіп, сауданың, қаржының, сақтандырудың және адамдар арасындағы сенімнің қалай пайда болғанын біледі. Батырдың оқиғалары арқылы балалар ақша мен заманауи ресурстарды тиімді басқару ұғымдарымен танысады.

"Мен балаларға қаржының – құр есеп-қисап емес, адамдар арасындағы қатынастар мен тарихи дамудың бір бөлігі екенін көрсеткім келді. Бұл оқиғадан балалар тек шытырман сәттерді емес, еңбек, сенім және еңбектің қадірін түсіну сияқты өмірлік сабақтарды алсын дедім. Төрт ұлым мен бір қызым бар әке ретінде мен үшін ең бастысы – балаларымның қаржылық сауаттылықты ерте жастан меңгеріп, өз болашағын жоспарлай білгені", – деді кітап авторы Әблимит Рахматулаев.

Қаржы нарығын реттеу және дамыту агенттігінің Әлеуметтік жобалар мен қаржылық сауаттылықты арттыру департаментінің директоры Александр Терентьевтің айтуынша, қаржылық мәдениет балалық шақтан қалыптасуы керек. Мұндай кітаптар күрделі ұғымдарды қарапайым әрі қызықты етеді.

Еске салайық, Freedom Life 2024 жылы "Жасыл сандықша" атты қазақ тіліндегі қаржылық ертегілер жинағын шығарған болатын. Сәйкесінше, бұл – балалардың қаржылық сауатын арттыруға арналған екінші кітап.

"Біз әрбір балаға ақша мен оны дұрыс басқару туралы білім қолжетімді болуы тиіс деп санаймыз. Жолбарыс туралы кітап – балалардың қаржылық мәдениетін ерте қалыптастыруға және болашаққа сеніммен қарауға бағытталған тағы бір маңызды қадам", – деді компанияның басқарма төрағасы Азамат Ердесов.

Оқи отырыңыз:

• "Қарызсыз қоғам" қаржы сауатын арттыру жобасы үкіметтік деңгейге өтеді
• Күзде оқуға арналған 5 шығарма: Кітап блогері ұсынған тізім