Күл шамамен 4400 метр биікке дейін көтерілген .

Жапонияның оңтүстігіндегі Кагосима шығанағында орналасқан Сакурадзима жанартауы атқылады. Бұл туралы Жапонияның Метеорологиялық басқармасы хабарлады.

Ведомство мәліметінше, жанартау жергілікті уақытпен сағат 00:57-де атқылай бастаған. Күл шамамен 4400 метр биіктікке дейін көтерілген. Алдын ала ақпарат бойынша, қаза болғандар мен зардап шеккендер жоқ. Жақын маңдағы елді мекендерде де ғимараттар зақымданбаған.

Жапония билігі түтін мен күлдің таралу қаупіне байланысты көрші префектураларға ескерту жасады.

Айта кетейік, Сакурадзима – Жапониядағы ең белсенді жанартаулардың бірі. 2016 жылдың ақпанынан бастап кратерге кіруге шектеу қойылған, оған екі шақырымнан жақын жерге келуге тыйым салынады.

Бұрын жанартау орналасқан түбек Кагосима шығанағындағы жеке арал болған. Алайда 1914 жылғы ел тарихындағы ең қуатты атқылаудан кейін лаваның шығанақтың шығыс бөлігін толтыруы салдарынан арал Осуми түбегімен қосылып кеткен.

Оқи отырыңыз:

• Камчаткада Еуразиядағы ең биік жанартау атқылай бастады
• Табиғи апаттардың 90 пайызы сумен байланысты – UNEP басшысы