Дропперлермен күрестің ең тиімді жолы – қаржылық сауаттылықты арттыру.

Цифрлық даму министрлігінің Ақпараттық қауіпсіздік комитетінің төрағасы Руслан Әбдіқалықов Қазақстанда Ұлттық банктің антифрод орталықтарын телекоммуникация операторларының орталықтарымен біріктіру жұмысы басталғанын айтты. Бұл алаяқтармен күресті күшейтудің бір қадамы, деді ол Мәскеуде өткен Positive hack days фестивалінің аясында.

"Өткен жылы Ұлттық банктің жанынан екінші деңгейлі банктерді біріктіретін антифрод орталығы құрылды. Орталық алаяқтық операциясы тіркелген кезде оны ерте байқап, одан әрі ақша аударымдарының жасалуын болдырмайды. Дәл осы секілді антифрод орталықтары телекоммуникация операторларының бәрінде құрылды. Олар алаяқтық әрекет жасаған абонент нөмірлерін бұғаттайды", – деп түсіндірді Руслан Әбдіқалықов.

Ақпараттық қауіпсіздік комитеті енді осы екі тәжірибені біріктіру арқылы олардың қызметін күшейтуді жоспарлап отыр. Қазіргі таңда бұл бағыттағы жұмыстар басталған.

Оқи отырыңыз: Қазақстан неге хакерлердің қызметіне ақша төлеуді қолдайды

"Жүйелер біріккен жағдайда алаяқ телекомуникация жүйесінде тіркелсе, оның абоненттік нөмірі ғана бұғатталмайды, оған қоса банк жүйесіндегі есепшоттары арқылы да операция жасауға шектеу енгізіледі. Керісінше, қандай да бір есепшотта күмәнді ақша аударымы не оған әрекет байқалса, шот иесінің абоненттік нөмірлері де қадағалауға алынып, қажет жағдайда бұғатталады", – деді Руслан Әбдіқалықов.

Комитет төрағасы бұл ретте Қазақстанда дропперлер мәселесі өте өзекті болып отырғанына тоқталды. Оның сөзінше, арзан пайдаға кенелгісі келген жастар, оның ішінде негізінен студенттер дропперге айналып отыр.

"Дроппер болу үшін 50 картаң болуы шарт емес. Студенттік картасын қолдану арқылы қылмысқа қатысып жүргендер көп. Өкініштісі сол, ақша аударымдары шетелге жасалады, оны бақылау мүмкін емес. Ал қылмыстық іс қозғалғанда ең бірінші ақша аударылған карта иесі, яғни, өзіміздің студенттеріміз, жастарымыз құрыққа ілініп қалады. Дропперлермен және жалпы алаяқтықпен күрестің ең тиімді тәсілі – қаржылық сауаттылықты арттыру", – деп түсіндеді Руслан Әбдіқалықов.