Бүгін Жетісу облыстық сотында биыл жазда кісі қолынан қаза тапты делінген жас келіншек Айзат Жұманованың анасынан жауап алынды. Салтанат Жұманованың айтуынша, қызы күйеуінің қызба мінезі бар екенін айтып, бірнеше рет шағымданған, деп хабарлайды Kazinform.

Әйелдің айтуынша, айыпталушыдан көп адам қорқады және оған қарсы шығуға батылы жетпейді. Ерлі-зайыптының телефондары біріне-бірі синхронизация жасалған. Айзаттың телефоны үйінің ауласындағы дәретханаға түсіп кетіп, басқасын алған.

Анасының сөзінше, қызғанышқа негіз болмаған, өйткені ол жақта тіпті ұялы байланыс жоқ

Марқұмның анасы ерлі-зайыптының үйлену тойына дейін бес жыл сөйлесіп жүргенін, кейін үш жыл ерлі-зайыпты болып өмір сүргенін айтады. Куәгер күйеу баласының тарабынан қызын соққыға жығуы некелеспей тұрып басталғанын мәлім етті.

Әйелдің сөзінше, қызы таңғы сағат 3-тер шамасында қайтыс болған, ал сотталушының анасы оның қайтыс болғаны туралы таңғы сағат 9-да ғана хабарлаған. Салтанат Жұманованың айтуынша, оның қызы тұйық, сабырлы, үлкендерді және күйеуінің ата-анасын сыйлайтын.

Әйел марқұм қызының денесінде сызаттар мен көгерген жерлері болғанын айтты. Сонымен қатар куәгер қызының шашынан шөп байқағанын, екі тізесі сызылғанын, қолы мен саусақтары түгел жарақаттанғанын мәлім етті.

Атышулы іс бойынша сот процесі жалғасуда.

Еске сала кетейік, биыл шілдеде желіде "Жетісу облысы Ақсу ауданында жас әйел бірнеше сағат бойы азаптаудан кейін өлді" деген ақпарат тарады. Қайғылы жағдайға қатысты облыстық полиция департаменті өкілдері түсінік беріп, істің тергеліп жатқанын мәлім еткен болатын.

Мәтіннен қате тапсаңыз, бізге жазыңыз