Оралда ата-аналар балабақшаның жөндеу жұмыстары созылып кеткеніне алаңдайды .
Әу баста білім басқармасы шаһардың орталығындағы мектепке дейінгі білім беру мекемесін бір айда жөндеп бітіреміз деген. Содан бері үш ай өтті. Құрылыстың аяқталар түрі көрінбейді.
Әдетте бөбектердің күлкісінен жаңғырып жататын бөбекжай ауласы дәл қазір тым-тырыс. Мектепке дейінгі білім беру мекемесінің жабылғанына 3 ай болған. Маусымның басында жөндеу жұмыстары бір айда бітеді делінген. Бірақ ол уәде айдан-айға өзгеріп келеді.
Юлия Коняшина, қала тұрғыны:
- Жөндеу жұмыстары екі айға созылады деді. Жақсы, келістік. Одан тамыз айының аяғында бітеді деді. Қайда барамыз, оған да көндік. Бірақ міне қыркүйек болды, әлі бітер түрі жоқ. «Қарлығаш» балабақшасы осы аудандағы жалғыз мекеме. Бөбектерімізді қайда жібереміз?
Жаз басталғалы құрылысшылар балабақшаның тек шатырын алмастырған. Ал ішкі әрлеу жұмыстары өте баяу жүріп жатыр, деп шағымданады ата-аналар.
Виктория Благовещенская, қала тұрғыны:
- Терезелерді көріп тұрсыздар ғой, қандай үлкен екенін. Соның бәрін ауыстыру керек. Одан кейін сол терезелердің ішкі қырын шығару керек. Оның бәрі аз жұмыс емес. Қазір бізге 13 қыркүйекте жөндеуді бітіріп, балабақшаны ашамыз деген уәде беріп жатыр. Бірақ біз сенбейміз.
Балабақша басшылығының айтуынша, жөндеу жұмыстары конкурстық процедураларға байланысты созылған. Яғни төбені бір кәсіпкер жөндесе, ішкі жұмыстар келесі кәсіпкерге берілген. Олар есік пен терезені, электрожелілерді ауыстырып, қабырғасы мен еденін жаңғыртуы тиіс. Құрылыстың жалпы құны 84 миллион теңге. Жалпы балабақша ғимараты 1962 жылы тұрғызылса, содан бері жөндеу көрмеген.
Ақмарал Қамалова, №28 балабақша директорының міндетін атқарушы:
- Маусым-шілде айларында шатыр жөндеу жұмыстары өткізілді. Бірақ ауа райы қолайсыздығынан маусым бойы жаңбыр жауды, шілдеде жаңбыр жауды. Солай жұмыстар созылып, 18 шілдеде жұмыс аяқталып тапсырылды. Содан кейін ашық конкурс бойынша ішкі жөндеуге конкурс жарияланды. Ол конкурс 13 тамыз күні жаңа айтып кеткен «ESS Уральск» компаниясы ұтып, сол күні келісім шартқа қол қойылды. Сол күннен бастап ішкі жұмыстар жүргізіліп жатыр.
Оралда 49 мемлекеттік балабақша бар. Олардың жылу маусымына дайындығы мен жөндеу жұмыстарына биыл бюджеттен жарты миллиард теңге бөлінді. Қазір бөбекжайлардың 42-сі жұмыс істеп тұр.
Е. Жылқайдарұлы, Б. Жарылғасов, Э. Аюпов
