Кеменің ұзындығы 50 метрден асады.

Тиісті ақпаратты Батыс Қазақстан облысы әкімдігінің баспасөз қызметі таратты, деп хабарлайды inbusiness.kz сайты.

Оралда Отан қорғаушы күніне орай еліміздегі ең ірі кеме суға түсірілді. Салтанатты рәсімге облыс әкімі Нариман Төреғалиев қатысып, Президент тапсырмасы бойынша ҚР Қорғаныс министрлігінің тапсырысы аясында жүзеге асырылған маңызды жобаның сәтті аяқталуымен құттықтады. Корабльге мемлекет және қоғам қайраткері Дінмұхамед Қонаевтың есімі берілді.

Зауыт жасап шығарған 37-інші су көлігінің салмағы – 720 тонна. Жүк тасымалдауға арналған трюмнің көлемі – 30 текше метр. Кеменің жылдамдығы 16 түйінге дейін жетеді. Ұзындығы – 51 метр, ені – 9,5 метр. 8 балдық дауылға шыдас береді.

Көпфункционалды кеме әскери теңіз күштерінің кемелері мен катерлерін дизельдік отын, ауызсу, азық-түлік және өзге де материалдық-техникалық жағынан қамтамасыз етуге бағытталған. Жеке құрам 30 шақты адамнан тұрады. Экипаж үшін қолайлы жағдай жасалған.

Су көлігі теңізге шыққанға дейін көпір астынан өтуге тура келеді. Сондықтан алып кеменің діңгегі Ақтау айлағында орнатылады.