Елімізде «Таза Қазақстан» бірегей экологиялық бастамасы оң нәтиже беріп келеді, деп хабарлайды 24kz.

Соңғы 5 айда ұлттық жоба аясында 500-ге жуық ауқымды шара ұйымдастырылыпты. Өңір-өңірдегі тазалық жұмысына 2 млн қазақстандық қатысып, тазалыққа өз үлесін қосып үлгерген. Ортақ еңбектің нәтижесінде 1 миллион 800 мың түптен астам ағаш отырғызылды. Қоршаған ортаны қорғауға бағытталған жұмыста еңбегі ерен кімдер? Бас қалада тазалық қандай деңгейде атқарылып жатыр?

Кәмшат Мұхамеджан, тілші:

- Ала таңнан қолына сыпырғы мен күрегін алып, қала тазалығына кірісетін көптің бірі – Кәуен аға. Жанкешті еңбек етіп жүргеніне ширек ғасырға жуықтапты. Жұмысқа Астана іргесіндегі ауылдан қатынайды. Жасы зейнетке жақындап қалса да, шаруасына тиянақты. Шаршадым деп налымайды.

Кәуен Қабылашат, жұмысшы:

- Күнделікті аумақ бөліп береді. Соны тазалайсыз. Сыпырып, күреп, қоқысын шығарамыз. Жаңбыр жауса, суын аршып. Қыста қардан тазалап, жолын аршимыз. Алдымен келе салып, аялдамаларды тазартамыз. Адамдар тайып жығылмасын деп. Таңғы сағат 4:30да үйден шығамыз, қалаға жеткенше 6:30 болады. Күрек-сайманымызды алып шығамыз.

Бас қала тазалығына басты жауапты мекеменің бірі – «Астана тазалық». Шаһарды күтіп ұстау, көшелерін көріктендіру, қоқыстан тазарту мойындарында. Демалыс деп дамылдамайды. Себебі, елордада келімді-кетімді ел көп. Көретін көзге Астананың ажары да, айналасы да мұнтаздай таза болуы керек. Жауаптылар мұны жақсы біледі. Артылған жүк пен сенімге селкеу түсірмей келеміз деп сендірді. Сөздерінше, соңғы 5 айда 4000-ға жуық қалдық шығарылыпты. Көрсеткіш өткен жылмен салыстырғанда азайғанын байқатады.

Ержан Айтмаханұлы, «Астана тазалық» ЖШС-нің бөлім басшысы:

- 2024 жылы 11 мың тоннадай қоқыс шығарылған болатын. Биыл азайып отыр. Оның себебі біз былтырлары мұзға қарсы құм қоспасын қолданатынбыз. Биылдан бастап біз құм қоспасын алдық. Сол себепті қоқыстың көлемі едәуір азайды. 450-ден астам техника бар. Жыл сайын бұл техникалар көлемі ұлғайып, жаңартылуда.

Мекеме қарамағында қазір 1300-ден астам жұмысшы бар. Қаңтардың қақаған аязы, шілденің шіліңгір ыстығы да оларға кедергі емес. Бастысы – шаһардың шырайына сын келтірмеу керек. Биыл көгалдандыру жұмысына ерекше мән беріліпті. Ілкімді іске «Таза Қазақстан» ұлттық жобасы серпін беріп отыр. Аясында соңғы 5 айда республика бойынша 500-ге жуық тазалық шарасы ұйымдастырылған. Ортақ еңбек нәтижесі де ауыз толтырып айтарлықтай. 1 миллион 800 мың түптен астам ағаш отырғызылған.

Бақдаулет Амангелдинов, ҚР Экология министрлігі Орман шаруашылығы және жануарлар дүниесі комитетінің бас сарапшысы:

- Көгалдандыруға бағытталған «Болашақты бірге отырғызайық», көпқабатты үйлердің ауласына көшет отырғызу бойынша «Жасыл аула», оқушылармен бірлесіп өтетін «Түлектердің ағаш егуі», сондай-ақ елді мекендерде жергілікті атқарушы органдар өткізетін «Қала үшін ағаш», республика бойынша өңірлердің ауа райы ерекшеліктеріне орай жылына 2 рет ұйымдастырылатын «Бүкілқазақстандық ағаш отырғызу күні» сынды акциялар бар.

Бүгінде экологиялық мәдениетті қалыптастыруға бағытталған бастаманың аяқ алысы жаман емес. Соңғы 5 айда «Таза Қазақстан» аясында 2 млн адам акцияға қатысып, табиғат ананы қорғауға өз үлесін қосыпты. Белсенділер қатарында еріктілер де бар. Еліміздің түкпір-түкпіріндегі 130 мыңнан астам жас тазалық жұмысына жұмылдырылған.

Авторлары: Кәмшат Мұхамеджан, Жарқын Өрден, Асхат Қарақойшиев