Қазақстанда AI Stat виртуалды көмекшісі іске қосылды.

Ұлттық статистика бюросы AI Stat атты жасанды интеллектке негізделген виртуалды көмекшіні іске қосты. Жаңа сервис статистикалық деректермен жұмысты жеңілдетіп, пайдаланушыларға түсетін жүктемені азайтуға бағытталған, деп хабарлайды бюроның баспасөз қызметі.

Ведомство мәліметінше, көмекші есептілік ақпаратында жылдам бағдар алуға, қажетті мәліметтерді оңай табуға және байланыс орталығына жүгінбей-ақ қызметтерді пайдалануға мүмкіндік береді.

Жоба 2026 жылдың сәуірінде пилоттық режимде іске қосылып, пайдаланушылар тәжірибесі негізінде жетілдірілген. Нәтижесінде жүйенің білім қоры кеңейтіліп, сұраныстарды өңдеу алгоритмдері оңтайландырылған, жауаптардың дәлдігі артқан.

"AI Stat диалог форматында жұмыс істейді. Ол статистикалық есептілікке қатысты сұрақтарға жауап беріп, есеп нысандарын толтыруға көмектеседі және қателік жіберу ықтималдығын азайтады. Сонымен қатар пайдаланушыларға цифрлық ресурстарда, соның ішінде респондент кабинетінде ыңғайлы навигация жасауға мүмкіндік береді. Сервис БСН немесе ЖСН арқылы міндетті статистикалық нысандардың тізімін қалыптастырып, қызмет түріне сәйкес ЭҚЖЖ кодтарын ұсына алады. Қажет болған жағдайда өтініштерді байланыс орталығына жолдайды", – делінген хабарламада.

Оқи отырыңыз: Қазақстанда ЖИ көмегімен жасалған фильмдердің халықаралық фестивалі өтеді

Бюро басшысы Мақсат Тұрлыбаевтің айтуынша, бұл шешім бірінші деңгейлі қолдау қызметін атқарып, операторларға түсетін жүктемені азайтады және ақпарат алу уақытын қысқартады.

Қазіргі уақытта AI Stat екі тілде қолжетімді. Алдағы уақытта ағылшын тіліндегі нұсқасын іске қосу жоспарланып отыр.