Тек сәуір айының өзінде 18 144 техника құрастырылған.

Еліміздің автомобиль өнеркәсібі биыл да қарқынын жоғалтқан жоқ, деп хабарлайды inbusiness.kz сайты.

Кейбір ірі зауыттардағы өндіріс көлемі төмендесе де, жалпы көрсеткіш айтарлықтай өсім көрсетіп отыр. Әсіресе, жаңа өндіріс алаңдарының іске қосылуы нарықтағы күштердің қайта бөлініп жатқанын аңғартады.

ҚР Ұлттық статистика бюросының мәліметіне сәйкес, 2026 жылдың қаңтар-сәуір айларында елде 63 403 бірлік техника өндірілген. Оның құрамына жеңіл және жүк көліктері, автобустар, арнайы техника, тіркемелер мен жартылай тіркемелер кіреді. Бұл – өткен жылдың осы кезеңімен салыстырғанда 35,1 пайызға жоғары көрсеткіш.

Саладағы жалпы өндіріс көлемі 764,3 млрд теңгеге жетіп, өсім 19,6 пайызды құрады. Қазір автомобиль жасау өнеркәсібі Қазақстандағы бүкіл машина жасау саласының 42,1 пайызын иеленген.

Төрт ай ішінде Қазақстанда 59 057 жеңіл автомобиль шығарылған. Бұл бір жыл бұрынғы көрсеткіштен 36,8 пайызға көп. Сонымен қатар, 1 967 жүк техникасы, 986 автобус, 177 арнайы техника және 1 216 тіркеме мен жартылай тіркеме өндірілді.

Нарықтағы негізгі өндірушілер арасында өзгеріс анық сезіледі. Қостанайдағы Allur зауыты 23 161 көлік шығарып, көшбасшылық орнын сақтап қалғанымен, өндіріс көлемі 12,7 пайызға қысқарған. Ал Алматыдағы AMMKZ жаңа өндіріс ретінде бірден 17 710 автомобиль құрастырып, нарықтағы ықпалын күшейтті. Ал Hyundai Trans Kazakhstan 28,4 пайыздық төмендеу көрсетсе, Kia Qazaqstan өндіріс қарқынын ұлғайтып, 6 575 көлік шығарған.

Ең көп шығарылған модельдердің көшін Chevrolet Cobalt бастап тұр. Төрт айда бұл модельден 7 755 дана өндірілген. Одан кейін Hyundai Tucson, Kia Sportage, Hyundai Mufasa және Changan CS55 Plus модельдері орналасқан.

Қазақстандағы автонарық қазір жаңа кезеңге өтіп жатыр деуге болады. Бұрын бірнеше зауытқа тәуелді болған өндіріс енді жаңа ойыншылардың есебінен әртараптанып келеді. Бұл өз кезегінде бәсекені күшейтіп ғана қоймай, ішкі нарықтағы баға мен модель таңдауына да әсер етуі мүмкін.