Бұл ақпаратты Ұлттық статистика бюросы таратты.

Ресми деректерге сай, Отан қорғаушылар күніне орай елімізде 10 044 673 ер-азамат құттықтау қабылдайды, деп хабарлайды inbusiness.kz сайты.

Мереке қарсаңында ерлердің қай өңірлерде басым екені де жазылған.

Жас топтары бойынша ерлердің үлесі назардан тыс қалмаған. Мысалы, 0-15 жастағылар 30,2% болса, 16-60 жас аралығындағылар 56,5% пайызды құрады. Сол секілді, 61 жас және одан жоғары жандар 13,3%-ға жеткен.

Ерлер ең көп шоғырланған өңірлер көшін Алматы қаласы (1,1 млн) мен Түркістан облысы (1,1 млн) бастаған. Тиісінше, Алматы облысында 806,5 мың ер-азамат қоныстанса, Астана қаласында 785,4 мыңы тұрып жатыр.

Ал ерлердің орташа жасы – 31,1 жас. Күтілетін өмір сүру ұзақтығы – 72,19 жыл.

2025 жыл бойынша жұмыспен қамтылған халық арасындағы ерлердің үлесі 51,6%-ға (4,8 млн ер адам) жеткен.

Яғни, жалдамалы жұмысшылар арасындағы үлес 50,6%-ға шықса, өз бетінше жұмыспен қамтылғандар арасындағы үлес 55,1%-ды құрайды.

Салалар бойынша жұмыспен қамтылған ерлердің үлесінің де статистикалық көрсеткіші бар.

Олар:

• Өнеркәсіп – 16,5%;
• Көтерме сауда – 14%;
• Ауыл шаруашылығы – 12,4%;
• Көлік және қойма – 11,1%.

Сонымен қатар, жеке кәсіпкерлер арасындағы ерлердің үлесі 54,7% болса, ең көп жұмыспен қамтылған ерлер 35-44 жас аралығында (1,4 млн адам) екен.