Бірыңғай платформа арқылы 66 мыңнан астам геологиялық есепті онлайн алуға болады .
Өнеркәсіп және құрылыс вице-министрі Иран Шархан геологиялық ақпаратты толық цифрландыруды келесі жылы аяқтау көзделіп отырғанын айтты, деп хабарлайды inbusiness.kz сайты.
"Бүгінде Бірыңғай жер қойнауын пайдалану платформасын енгізу нәтижесінде сала ашық, басқарылатын және қолжетімді бола түсуде. Аталған платформада өтінім беруден бастап, лицензия алуға дейінгі толық цифрлық цикл қарастырылған. Жалпы платформада жиырма екі мемлекеттік қызмет көрсетіледі, электронды аукциондар мен бонустарды онлайн төлеуге мүмкіндік беретін "электронды әмиян" сервисі іске қосылған", – деді Иран Шархан Үкімет отырысында.
Биыл жүйеде бес жарым мыңнан астам келісімшарт пен лицензия цифрландырылды, 730-ға жуық лицензия берілді, 4 аукцион өткізіліп, бонустан 45 млрд теңге бюджетке түсті.
Оның айтуынша, Бірыңғай платформа арқылы 66 мыңнан астам геологиялық есепті онлайн алуға мүмкіндік бар.
"Сонымен қатар бастапқы геологиялық ақпаратты да цифрландыру жүргізілуде. Бүгінде оның 73 пайызы электронды форматқа ауыстырылды, жыл соңына дейін 97 пайызға жетеді. Толық цифрландыруды келесі жылы аяқтау көзделіп отыр", – деді Өнеркәсіп және құрылыс вице-министрі.
