Жаңа құрылыс порталында бюджет есебінен немесе мемлекеттік инвестицияларға салынатын жобалар бастан аяқ бақыланады.

Ал қалған қатысушылар, яғни жеке қаржысын құйғандар мемлекеттік сараптамадан өту үшін кірсе жеткілікті. Жалпы «бір терезе» қағидаты арқылы жаңа ғимарат салу, күрделі жөндеу, қайта құрылымдау мен бас жоспар түзу мәселесі шешіледі. Портал ашықтықты арттырып, жұмыс үдерісін жеделдетіп, құрылыс барысын қадағалауды күшейтеді, дейді мамандар. Ал epsd.kz ақпараттық жүйесі 13 жыл бұрын құрылған және заман дамуына сәйкес келмейді.

Саламат Серікхалиев, «Мемсараптама» РМК бас директорының орынбасары:

- Жаңа порталдың ескісінен басты айырмашылығы – қолданушылар санатына байланысты. epsd.kz екі жақты жүйе болатын. Құрылысқа тапсырыс беруші және сараптамашы. Ал қазіргі порталда құрылыс барысындағы барлық қолданушы қамтылады. Жоғарыда айтқандардан бөлек инженерлер, жобалаушылар және мемлекеттік органдар. Қысқасы біздің мақсат – тапсырыс берушіні нақты бағыттау. Демек, ол құрылыстың әр кезеңіне қанығып отырады.