Жеке деректерді қорғау ең маңызды басымдықтардың бірі болып қалады .

Қаржы нарығын реттеу және дамыту агенттігінің төрағасы Мәдина Әбілқасымова алақан арқылы төлем жасау технологиясының іске қосылуына қатысты пікір білдірді, деп хабарлайды inbusiness.kz сайты.

Оның айтуынша, салада кез келген жаңа технология енгізілген кезде ең алдымен қауіпсіздік жіті назарда болуы керек.

"Жеке мәліметтердің қорғалуы қалай қамтамасыз етіледі деген сұрақ туындайды. Бұл жаңа алаяқтық операциялар кезінде пайдаланылмай ма? Алаяқтар бұл сәйкестендіру әдісін айналып өту үшін жаңа тәсілдер ойлап таппай ма? Біз де өз тарапымыздан алаяқтықпен күресу үшін жаңа шаралар мен шектеулер енгізіп келеміз. Банктердің алдына клиенттерді дұрыс сәйкестендіру және антифрод процедураларын орындау талаптарын қойып отырмыз", – деді ол.

Мәдина Әбілқасымова жеке деректерді қорғау ең маңызды басымдықтардың бірі екенін атап өтті.

"Қаржы өнімдерін әзірлеу барысында қандай талаптар сақталуы керек екені нақты көрсетілген қаулы бар. Егер біз қандай да бір бұзушылықтарды анықтасақ, онда мұндай қаржы өнімін немесе қаржылық қызметті тоқтатуға құқығымыз бар", – деді агенттік басшысы.