Инновациялық әдіс алтынды тиімді бөліп алып, шикізатты өңдеу шығындарын азайтуға мүмкіндік береді.

Қазақстандық ғалымдар қиын байытылатын кендерден алтынды тиімді бөліп алуға арналған жаңа технология әзірледі, деп хабарлайдыinbusiness.kz сайты.

Зерттеу нәтижелері зертханалық сынақтардан сәтті өтіп, өндірісте қолдануға перспективалы шешім ретінде бағаланып отыр.

Жоба Қазмеханобр өнеркәсіптік экология мемлекеттік ғылыми-өндірістік бірлестігінің мамандары тарапынан жүзеге асырылды. Ғылыми жұмысты PhD докторы, қауымдастырылған профессор Бауыржан Сүрімбаев басқарған.

Ғалымдар алтын құрамды тотыққан және сульфидті кендерді өңдеуге арналған екі инновациялық тәсіл ұсынды.

Тотыққан кендер үшін үймелі шаймалау алдында сутегі асқын тотығымен алдын ала өңдеу және натрий ацетатын қолдану технологиясы әзірленген. Бұл алтынды бөліп алу деңгейін 14%-ға дейін арттыруға мүмкіндік берген.

Ал сульфидті кендер үшін гравитациялық концентрат алып, оны қарқынды циандау арқылы өңдеу әдісі енгізілді. Мамандардың айтуынша, натрий ацетатын пайдалану алтынды бөліп алу тиімділігін арттырып қана қоймай, қымбат реагенттердің бір бөлігін алмастыруға мүмкіндік береді.

Зерттеу нәтижелері халықаралық ғылыми қауымдастық тарапынан да жоғары бағаланған. Жоба аясында 6 ғылыми еңбек жарияланып, оның ішінде халықаралық Q1 және Q2 деңгейіндегі ғылыми журналдарда мақалалар шыққан.

Әзірлеушілер алдағы уақытта технологияны өнеркәсіптік деңгейде сынақтан өткізіп, алтын құрамды кендерді өңдеудің жаңа реагенттік шешімдерін әзірлеуді жалғастыруды жоспарлап отыр.