Ол үшін әуелде әкімшілік құқықбұзушылық бойынша тағылған айыппен келісуі керек еді.

Бұл жайында ҚР Қаржылық мониторинг агенттігі төрағасының орынбасары Жеңіс Елемесов айтты, деп хабарлайды inbusiness.kz сайты.

Демек, блогер Ерболат Жанәбілов пен оның жұбайы Эльмира Төлегенова қылмыстық жауапкершіліктен құтылу мүмкіндігінен айырылып қалды.

ҚР Қаржылық мониторинг агенттігі төрағасының орынбасарының сөзінше, егер блогерлер өзіне тағылған әкімшілік құқықбұзушылықты мойындағанда, оларға тек айыппұл түріндегі әкімшілік жаза қолданылатын. Бұған тағы бір блогердің әрекетін мысалға келтіруге болады.

– Әкімшілік құқық бұзушылық туралы кодексте нақты жазылған: егер адам әкімшілік жауапкершілікке тартылуға қарсы болып, тиісті өтініш білдірсе, онда іс уәкілетті органда емес, сотта қаралады. Мысалы, Justking31 (Нұртаза Нұрбек) өзіне қатысты әкімшілік құқық бұзушылықпен келісті, хаттама толтырылып, қаулы шығарылды және ол айыппұл түрінде әкімшілік жауапқа тартылды. Айыппұлдар төленді. Ал Жанәбілов пен оның жұбайы бұзушылықты мойындаудан бас тартып, өтініш берген. Соның нәтижесінде іс сотқа жолданды, ал сот процесі барысында қылмыстық жазаланатын әрекет белгілерінің бар екенін анықтауға негіз болған басқа да фактілер анықталған болуы мүмкін, – деді Ж.Елемесов Сенаттағы брифинг барысында.

Бұған дейін 11 автокөлікті ұтысқа қойып, курс сатқан блогерлерге қатысты қылмыстық іс қозғалғанын хабарлаған едік.