Қазақстандық видеограф әрі тревел-блогер Дастан Мұхамедрахым WIBA Awards 2026 халықаралық премиясында "Әлемнің үздік тревел-блогері" номинациясын жеңіп алды, — деп хабарлайды Massaget.kz тілшісі.

Блогер қуанышты жаңалығын әлеуметтік желідегі парақшасында жазып, салтанатты марапаттау рәсімінен видео жариялады.

Марапаттау рәсімі Францияда, Канн кинофестивалі аясында өтті. Бұл жеңіс қазақстандық блогерге әлемге танымал инфлюенсерлермен бір қатардан көрінуге мүмкіндік берді.

WIBA Awards digital-контент саласындағы беделді халықаралық премиялардың бірі саналады. Бұл марапат интернет-индустрияға ықпал етіп, кең аудиторияның назарын аударған авторларға беріледі.

Дастан Мұхамедрахымның видеолары кинематографиялық стилімен ерекшеленеді. Ол роликтерінде табиғат көріністерін, қалалардың атмосферасын және әр елдің мәдениетін әсерлі жеткізеді. Соңғы бір жылда оның көптеген жарияланымы миллиондаған қаралым жинап, кейбір видеолары Instagram ұсынымдары мен ресми парақшаларына шыққан.

Әлеуметтік желі қолданушылары мен әріптестері блогерді жеңісімен құттықтап, бұл оқиғаны қазақстандық блогинг үшін маңызды жетістік деп бағалап жатыр.

Посмотреть эту публикацию в Instagram

Публикация от Dastan Mukhamedrakhim (@bydastann)

Бұған дейін Дастан Мұхамедрахымның WIBA Awards 2026 жеңімпаздары қатарына енгені хабарланған еді. Ал марапаттау рәсімі енді ғана өтті.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!