Марқұм Сәуле Ермаханованың қызы пластикалық ота жасаған клиниканы айыптап отыр.

Себебі, мекеме қызметкерлері жедел жәрдемді кеш шақырған, деп жазады inbusiness.kz сайты.

Қайғылы оқиға 15 мамыр күні Алматыдағы жекеменшік клиникада болған. Сәуле Ермаханова жергілікті анестезия (жансыздандыру) арқылы липосакция жасатуға жоспарлы түрде барған. Дәрігерлер бұл ем-домның 1–1,5 сағаттан аспайтынын айтып сендірген.

"Бір сағат өтті. Бір жарым, екі, үш сағат жылжыды. Біздің сұрақтарымызға ешкім жауап берген жоқ, жай ғана үндемей құтылды. Бірге барған туысымызға анамыздың енді жоқ екенін кешкі сағат 18:00 шамасында хабарлады", – деп жазды блогердің қызы әлеуметтік желіге.

Жедел жәрдем қызметі тек кешкі сағат 19:00-де жеткен. Марқұмның отбасы аналарының өлімінен кейін 4 күн өткен соң, таныстарын басқа есіммен клиниканың WhatsApp нөміріне хабарлама жаздырған. Нәтижесінде, клиника әкімшілігі түк болмағандай баға тізімдерін жіберіп, ақылы онлайн-консультация ұсынып, келесі аптаға ота жасатуға қабылдауды жалғастырған.

53 жасында қайтыс болған Сәуле Ермаханованың артында балалары мен немерелері қалды.

"Анамыз көпшілікке танымал болғанымен, біз үшін ол ең жылы, ең қамқор ана әрі әже еді. Жоспарлары көп еді. Қазір қылмыстық іс қозғалды. Біз аяғына дейін шындық пен әділдік үшін, бұл жағдай басқа ешкімнің басына қайталанбауы үшін күресеміз! Біз үнсіз қалмаймыз", – деді блогердің қызы.

Марқұмның отбасы тергеудің әділ өтуін және кінәлілер анықталғанша клиника жұмысын тоқтатуды талап етіп отыр.

Аталған дерек бойынша Бостандық аудандық полиция басқармасы қылмыстық іс қозғады.

"Аталған факті бойынша Бостандық аудандық полиция басқармасы қылмыстық іс қозғады. Қазіргі уақытта сотқа дейінгі тергеп-тексеру аясында қажетті тергеу әрекеттері жүргізіліп жатыр. Оның қорытындысы бойынша түпкілікті процессуалдық шешім қабылданады. ҚР ҚПК-нің 201-бабына сәйкес сотқа дейінгі тергеп-тексерудің өзге деректері жария етілмейді", – делінген полиция таратқан мәліметте.