Бұл көрсеткіш "Интер Майамидің" "Нэшвилл" клубына қарсы кездесуінде тіркелді.
Осылайша, Лионель Месси қатарынан 5 ойында дубль жасаған тұңғыш ойыншы атанып отыр, деп хабарлайды inbusiness.kz сайты.
Матч АҚШ-тың Форт-Лодердейл қаласында өткен. "Интер Майами" салған қос голды да әлемге әйгілі футболшы өз атына жазды. Артынша MLS баспасөз қызметі мұны Лига тарихындағы шағын рекордқа балап, Мессиді "қатарынан бес ойында дубль жасаған алғашқы футболшы" деп атады.
"Интер Майамидің" Жорди Альба, Серхио Бускетс пен Луис Суарес секілді өзге де жұлдызды ойыншылары бастапқы құрамда алаңға шықса да, мергендігімен көзге түспеді.
Қазіргі уақытта "Интер Майами" Шығыс конференциясында 19 турдан кейін 38 ұпаймен 5-орында тұр. Келесі турда Хавьер Маскерано жаттықтыратын клуб сырт алаңда "Цинциннати" клубымен кездеседі.
