Қалада жауын-шашынның рекордтық мөлшері тіркелді.

10 мамырда сағат 11:00-ден 11 мамыр сағат 20:00-ге дейін қала аумағына 50,4 мм жауын-шашын түскен. Бұл мамыр айына белгіленген айлық норманың (99 мм) 51 пайызына тең, деп хабарлайды inbusiness.kz сайты.

Осыған байланысты коммуналдық қызмет су басудың алдын алу және оларды жедел жою мақсатында күшейтілген режимде жұмыс жүргізді. Бұл жөнінде Коммуналдық инфрақұрылымды дамыту және тұрғын үй инспекциясы басқармасының өкілдері хабарлады.

Сонымен қатар, Алматы қаласының Құтқару қызметі де кезекшілікке кіріскен. Олардың қарамағында ассенизаторлық көлік пен 15 мотопомпа бар. Ал Төтенше жағдайлар департаменті тарапынан 53 арнайы техника мен 240 қызметкер тартылған.

Жалпы алғанда, қала инфрақұрылымының үздіксіз жұмысын қамтамасыз етуге бір тәулік ішінде 3 080 жол саласы жұмысшысы мен 1 225 арнайы техника қатыстырылған. Жедел әрекет ету үшін 2 300 құм толтырылған қап дайындалды.

Синоптиктердің болжауынша, 12 мамыр күні Алматыда кей жерлерде найзағай ойнап, жаңбыр жауады.

Ал 13 мамырда жауын-шашын тоқтап, күн ала бұлтты болмақ.