Еуразиялық экономикалық комиссияның (ЕЭК) деректеріне сүйенсек, 2025 жылы ЕАЭО-ға мүше елдердің барлығында инфляция деңгейі артқан. Дегенмен бұл экономикалық ахуалда ерекше көзге түсіп отырған мемлекет – Қазақстан. Елде баға өсімі барлық негізгі бағыттар бойынша ең жоғары деңгейде тіркелген, деп хабарлайды El.kz интернет порталы.

Өсу үдерісі үдей түсті

ЕЭК-тің соңғы есебіне сәйкес, 2025 жылғы мамырда ЕАЭО бойынша тұтыну бағаларының жалпы индексі (ТБИ) сәуір айымен салыстырғанда 100,5%-ды құрады. Ал 2024 жылдың желтоқсанынан бері жинақталған инфляция деңгейі 3,9%-ға жеткен. Жылдық есеппен алғанда (2024 жылдың мамырынан бастап), одақ бойынша орташа инфляция 9,7%-ға дейін жеделдеген.

Инфляцияның негізгі қозғаушы күштері әдеттегідей – ақылы қызметтер мен азық-түлік өнімдері.

2024 жылғы желтоқсан мен 2025 жылғы мамыр аралығында:

ақылы қызметтер ЕАЭО бойынша орта есеппен 5,8%-ға қымбаттады,

азық-түлік 4,8%-ға,

ал азық-түлікке жатпайтын тауарлар 1,1% ғана өскен.

Инфляциялық жарыста Қазақстан – көшбасшы

2025 жылғы мамырда тұтыну бағаларының ең жоғары өсімі Қазақстанда тіркелді. Елдегі жалпы тұтыну бағасы индексі 2024 жылғы желтоқсанмен салыстырғанда 6,1%-ға артқан. Бұл – ЕАЭО елдеріндегі орташа көрсеткіштен едәуір жоғары. Ал жылдық есеп бойынша (2024 жылғы мамырмен салыстырғанда) Қазақстандағы инфляция 11,3%-ды құрады.

Толығырақ қарастырсақ:

Азық-түлік өнімдері

2024 жылғы желтоқсаннан 2025 жылғы мамырға дейін Қазақстанда азық-түлік бағасы 6,7%-ға өскен – бұл ЕАЭО бойынша ең жоғары көрсеткіш. Салыстырып айтсақ, Ресейде бұл өсім – 4,5%, ал ЕАЭО бойынша орташа 4,8% болды.

Азық-түлікке жатпайтын тауарлар

Бұл категорияда да Қазақстан көш бастап тұр – 3,6% өсім. Ал Арменияда, керісінше, 0,3% төмендеу байқалған.

Ақылы қызметтер

Қызмет көрсету саласындағы баға өсімі Қазақстанда айқын көрінді – 7,8%. Бұл да ЕАЭО елдеріндегі орташа көрсеткіштен (5,8%) әлдеқайда жоғары.

Айта кету керек, бұл көрсеткіштер алдын ала жарияланған және кейін нақтылауға жатады. Алайда қазірдің өзінде бұл деректер ЕАЭО аумағындағы инфляциялық үрдістердің сипатын анық көрсетіп отыр. Сарапшылардың айтуынша, Қазақстан экономикалық талдаушылардың ерекше назарында болатын басты аймаққа айналып отыр.