Мәжіліс депутаты әлемнің бірқатар елі балалардың желіні қолдануын реттеуге көшкенін алға тартты.

Мәжіліс депутаты Асхат Аймағамбетов әлеуметтік желіні пайдалану, смартфон қолдану және жасанды интеллект саласында реттеу мәселелері тез арада шешімін табу қажет деп есептейді. Бұл туралы ол Adal adam Youtube арнасына берген сұхбатында айтты.

"Әлеуметтік желіні тым артық қолданудың балаларға зияны туралы зерттеулер бар. Оларда әлеуметтік желінің балалардың менталдық, психикалық және жалпы денсаулық жағдайына кері әсері туралы нақты деректер берілген. Соған орай, әлемде көптеген елдер, мәселен, Франция 15 жасқа дейінгі балалардың әлеуметтік желіні пайдалануына тыйым салды. Мойындау керек, 3-5 жасар балаға TikTok қосып беру оның өміріне зиянын тигізеді. Сондықтан, ата-аналар өзінің балаларының не көріп, не тұтынып жатқанын бақылау ұстауы қажет. Әйтпесе, заңмен тыйым салудан оңайы жоқ. Бірақ, ол нәтиже бермейді. Біз Қазақстанда мектеп оқушыларының сабақ уақытында смартфон қолдануына тыйым салатын норманы енгіздік. Расын айту керек, бұл норманы енгізу өте күрделі болды. Үлкен шу болды, ата-аналар қарсы болды. Дегенмен, бұл тәртіп қабылданды", – деді Асхат Аймағамбетов.

Мәжіліс депутаты әлеуметтік желі де, жасанды интеллект те адамдар өміріне дендеп енгенін алға тартып, оған мүлде тыйым салу мүмкін емес екенін айтты. Ендігі шешім – оны реттеу, бақылау және басқару болуы керек.

"Қазір жасанды интеллектіні балалардың бәрі қолданады. Әрине, мұғалімдер де қолдана бастады, бірақ балалар олардан озып кетті. Басқа мемлекеттерде бұл мәселе бойынша нақты регламенттері, рәсімдері, академиялық адалдық саясаты бар. Біз оны бүгін қолданба деп тыя алмаймыз. Әлеуметтік желі бойынша да солай. Біз оны тек реттеуіміз, бақылауымыз және басқаруымыз керек. Ол үшін шындық пен өтірік қайсы екенін айыра алу үшін сыни ойлауды үйретуге тиіспіз. Балалар контентті тануды және оны қолдана білуді, цифрлық әдеп мәселелерін үйренуі керек. Әлемнің көптеген елдері реттеу тәртіптерін қабылдады. Біз де бұл істе кеш қалып қоймауымыз керек", – деді мәжіліс депутаты.

Оқи отырыңыз:

• Стритлифтинг, воркаут және спорт трюктері. TikTok-тағы қазақстандық спорт насихатшылары кімдер?
• Ата-аналар енді баласының қанша уақыт TikTok көргенін бақылай алады