Павлодар облысының әкімі Асайын Байхановтың әлеуметтік желідегі белсенділігі халық назарына түсті, — деп хабарлайды Massaget.kz тілшісі.

"Әкімдік қайда қарап отыр демесін деп"

Өңір әкімі Threads желісінде парақша ашып, азаматтарға пікір жазып, сұрақтарына жауап берген. Арасында қызық жауаптар да бар.

"Сізді бұл жақтан көремін деп ойламадым" деген желі қолданушысына әкім былай жауап берген: "Әкімдік қайда қарап отыр?!" демесін деп, сондықтан біз барлық жерде бармыз".

Әкімнің өзі не дейді?

Асайын Байхановтың айтуынша, Threads желісіне жақында ғана тіркелген.

"TikTok сияқты бұл жақты да жеке парақша ретінде пайдалануды жоспарлап отырмын, қызметтік емес (иә, иә, мен де басқалар сияқты адаммын, жеке көзқарасым және жұмыстан тыс қарапайым өмірге қатысты пікірім бар). ...Енді осы жерді біртіндеп зерттеп, бос уақытымда үйреніп, бейімделе бастаймын", — деді ол.

Павлодар облысы әкімдігінің Massaget.kz-ке берген жауабында бұл, расында да, өңір әкімінің парақшасы екені айтылған.

"Бұл — оның жеке парақшасы, жұмыс мақсатында пайдаланылмайды. Асайын Байханов әлеуметтік желідегі парақшаларын өзі жүргізеді. Негізгі жұмыс парақшалары Instagram мен Facebook-та", — деді әкімдіктің баспасөз қызметі өкілі.

Айта кетейік, ол 2022 жылғы желтоқсанда Павлодар облысының әкімі болып тағайындалды.

Instagram парақшамызға жазылып, ең қызықты ақпараттарды бірінші болып оқыңыз!