2 миллионнан астам ауыл тұрғыны сапалы интернетпен қамтылады деп күтіліп отыр.
Мәжіліс "Қазақстан Республикасы мен Халықаралық Қайта Құру және Даму Банкі арасындағы қарыз туралы" келісімді ратификациялады, деп хабарлайды inbusiness.kz сайты.
"Бұл келісім – Қазақстан экономикасын инклюзивті дамыту үшін дайындалған жедел цифрландыру жобасы аясында жасалып отыр. Жоба Қазақстан Республикасы Президентінің 2024 жылғы 21 қарашадағы Жарлығымен келісілген. Оның негізгі мақсаты қала мен ауыл арасындағы цифрлық теңсіздікті жедел азайтуға бағытталған. Келісімнің мақсаты – телекоммуникациялық инфрақұрылымды дамыту, яғни ауылдық жерлерде интернет желісін үй шаруашылықтарына дейін жеткізу. Сонымен қатар, жеке инвестицияларды тарту және байланыс саласындағы шағын және орта операторларға қолдау көрсету", – деді Цифрлық даму, инновациялар және аэроғарыш өнеркәсібі министрі Жаслан Мәдиев.
Айтуынша, жоба 2025–2027 жылдар аралығында үш жыл ішінде жүзеге асырылады.
"Осы кезеңде 1123 ауыл қамтылады. Бұл – шамамен 2,3 миллион азамат, немесе 500 мыңнан астам үй шаруашылығы. Жалпы инвестиция көлемі шамамен 84 млрд теңгені құрайды, оның ішінде жобаның шеңберінде капиталды шығындардың 50%-ға дейінгі бөлігі субсидияланатын болады. Жоба конкурсына кемінде 350 жеке абоненті бар және қаржылық тұрақтылығы дәлелденген операторлар қатыса алады. Сондай-ақ, бір кіші жобаға берілетін субсидияның ең жоғары мөлшері 250 млн теңгеге дейін болатынын атап өткім келеді", – деді ведомство басшысы.
Шығындар ішінде 42 млрд теңге мемлекеттік несие болса, тағы 42 млрд теңге – жеке бірлескен қаржыландырудың міндетті шарты.
"Осылайша, салаға кем дегенде 84 млрд теңге инвестиция салынады. Несиенің өзі 1 пайыз сыйақымен жапон иенімен алынады. Жоба 2028 жылы қарызды өтеу басталғанға дейін толығымен жүзеге асырылады. Қарыз 2035 жылға дейін өтеледі", – делінген Мәжіліс таратқан хабарламада.
