Ақ үй басшысы Иранның ядролық қаруға ие болуына жол бермеймін деп отыр.

АҚШ президенті Дональд Трамп Иран бейбіт келісімге келмесе, Тегеранға қарсы шабуылдар жалғасатынын айтты, деп хабарлайды inbusiness.kz сайты Modern.az басылымына сілтеме жасап.

Ақ үй басшысы нақты жауапты алу үшін тағы бірнеше күн күте алатынын мәлімдеді. Журналистер алдында сөйлеген Трамп жағдай тез ушығуы мүмкін екенін жасырмады.

"Егер біз тиісті жауапты алмасақ, бұл жылдам аяқталады. Біз бәріміз әрекетке дайынбыз", – деді АҚШ президенті.

Бұл ретте Тегеран АҚШ-ты шабуылдарды қайта бастамауға шақырды.

"Егер Иранға қарсы агрессия қайталанса, уәде етілген аймақтық соғыс бұл жолы аймақтық шеңберден шығып кетеді", – делінген Ислам революциясы сақшылар корпусы таратқан мәлімдемеде.

Иран стратегиялық маңызы бар Ормуз бұғазы сияқты су жолындағы көлік қозғалысын бақылау үшін жаңа "Парсы шығанағы басқармасын" құрды. Өз кезегінде Трамп Иранның ядролық қаруға ие болуына жол бермеймін деп отыр.

"Біз Иран мәселесі бойынша соңғы кезеңде тұрмыз. Не болатынын көреміз. Біз не келісімге келеміз немесе кейбір жағымсыз қадамдар жасаймыз. Алайда ол қажет болмайды деп үміттенемін", – деді Ақ үй басшысы журналистерге.