Бұған дейін бұл спутниктік интернет Қазақстан мен Тәжікстанда ресми іске қосылған болатын.

Енді Starlink спутниктік интернеті Қырғызстан аумағында қолжетімді, деп хабарлайды inbusiness.kz сайты жергілікті басылымға сілтеме жасап.

Бұл мемлекет Starlink-тің ресми қолжетімділік картасында сервисті пайдалануға болатын аумақ ретінде көрсетілген. 23 мамырдан бастап картада Available – "қолжетімді" мәртебесі жазылып тұр. Пайдаланушылар сайтта қосылу мүмкіндігін тексере алады. Олар қызметті рәсімдеу үшін нақты мекенжайды енгізуі тиіс.

Бұған дейін Қырғызстанның министрлер кабинеті пилоттық жобаны іске қосу үшін барлық рұқсат алынғанын хабарлаған болатын. Сондай-ақ Starlink-тің тиісті талаптарды орындап, уәкілетті мемлекеттік органдармен келісімдерге қол қойғаны белгілі болды.

"Спутниктік интернеттің енгізілуі шалғай елдімекен тұрғындарын жоғары жылдамдықтағы байланыспен қамтамасыз етуге, мектептерді, медициналық мекемелер мен басқа да әлеуметтік нысандарды цифрлық ресурстарға қосуға мүмкіндік береді", – деп жазады жергілікті Vesti.kg.