Елімізде шілденің екінші жексенбісі балықшылар күні тойланады, деп хабарлайды 24kz.
Қара алтынымен ғана емес, бекіре балығымен танымал Атырау өңірі бұл мерекені жылда ерекше атап өтеді. Биыл да сол үрдістен айнымай, балық өнімдерінің жәрмеңкесін ұйымдастырып, кемелер шеруін өткізді. Ардагерлер марапатталып, балықшылардың еңбегі еленді.
Асланбек Шығыр, тілші:
- Балықшылар күніне орай ұйымдастырылған жәрмеңкеге жиналған жұрттың қарасы қалың. Мұнда Жайықтан ауданған түрлі балық, ысталған, тұздалған өнімдер сатылып жатыр. Сатушылардың айтуынша, сазан мен көксеркеге сұраныс жоғары. Бүгінгі жәрмеңке сауда алаңы ғана емес, балықшылардың еңбегін дәріптеуге де бағытталды.
Жәрмеңкеге өңірдегі өндірістік кооперативтерден бөлек, Маңғыстау және Батыс Қазақстан облысының өндірушілері қатысты. Балықтың 27 түрлі өнімі сатылды. Жәрмеңкеден соң балықшылар шеруі ұйымдастырылды. Жалпы өңірде 18 кәсіпорын балық аулау, оны өңдеу жұмыстарымен айналысады. Былтырғы шілдеден бері 11 мың тоннаға жуық су маржаны ауланған. 3 мың тоннаға тарта балық өнімі экспортталды.
Саламат Омаров, Балық аулау кәсіпшілігінің директоры:
- Атырау облысы бойынша 3 балық өңдеу цехы бар, сонымен қатар Құрманғазы ауданы, Шортанбай селосында біз қазір үлкен балық өңдеу зауытының қайта құрылыс жұмыстарын жүргізудеміз. Батыс Еуропа мемлекеттері, Германия, Франция, Румыния, Молдова, Израиль, Әзірбайжан мемлекеттеріне көптеген біздің өнім түрлеріміз экспортталады.
Қазір өңірде Атырау бекіре зауыты күрделі жөндеуден өтіп жатыр. Алдағы уақытта бекіре шабақтарын өсіру көрсеткішін ұлғайтып, өңдеу өнеркәсібімен айналысатын жаңа кәсіпорындар ашу жоспарланған. Ол үшін бюджеттен 13 млрд теңгеге жуық қаражат бөлінді. Мемлекет басшысы балық шаруашылығын дамытып, салаға инвестиция тарту маңызды екенін атап өткен еді. Балықшылар күніне орай өңірге жұмыс сапарымен келген Ауыл шаруашылығы вице-министрі Аманғали Бердалин саладағы мәселелер туралы айтты.
Аманғали Бердалин, ҚР Ауыл шаруашылығы вице-министрі:
- Біз өзіміз шетелден бекіре тұқымдас балығын, өсіруге арналған азығын сол жақтан алып келеміз. Жалпы 4,5 мың тонна жылына пайдаланамыз. Соның бәрі шетелден алып келеді. Сондықтан қазір инвесторларды тартып, сол зауытты салуымыз керек, бірінші мәселе. Екінші мәселе, шабақ өсіруіміз керек өзімізге. 1 млрд-тан астам бізге шабақ керек.
Балықшылар күніне орай кемелер шеруі де ұйымдастырылды. 30-ға тарта кеме Жайықты толқындата жүзіп өтті. Сондай-ақ мерекелік іс-шара аясында 1 млн-ға жуық бағалы бекіре шабағы Жайық өзеніне жіберілді.
Авторлары: Асланбек Шығыр, Амантай Мәтенов, Жандос Рахметтуллин
