Елімізде алдағы 4 жылда 86 мың шақырым инженерлік желі жаңартылады. Оның 1,6 мың шақырымы жылу желілері болса, 77,6 мың шақырым электр желісі. Бұл жұмыстарға шамамен 6,8 трлн теңге инвестиция тартылмақ. Жоспарлы жұмыстарды "Энергетикалық және коммуналдық секторларды жаңғырту" ұлттық жобасы аясында іске асыру көзделіп отыр. Бұл туралы Астанада өткен іскерлік жиында үкімет басшысының орынбасары Қанат Бозымбаев хабарлады. Ақпарынша, қазіргі таңда табиғи монополиялардың 48 субъектісі бойынша пилоттық режимде жұмысын бастаған.

«Ұлттық жоба негізінен электр энергиясын өндіру қуаттарын дамыту, табиғи монополиялар саласын жақсартуды көздейді», — деді вице-премьер. Мұнымен қоса, ТҮКШ саласында процестерді автоматтандыру үшін цифрлық технологияларды толық енгізу қарастырылады. Бұл жұмысқа 200-ден астам компания тартылған.

Қанат Бозымбаев, ҚР Премьер-министрінің орынбасары:

- Келесі жылы іске асатын жобалардың қаржыландыру көздерін анықтау бойынша жұмыс белсенді жүргізілуде. Қаржыландыру бюджет, нарықтық көздер, оның ішінде халықаралық қаржы ұйымдарының қаражаттары мен тариф есебінен іске асырылады. Бұл ретте тарифтің жоспарлы өзгеруі де ескерілген. Ұлттық жобаны іске асыру мақсатында «Қазақстан тұрғын үй компаниясы» Қарағанды, Павлодар, Батыс Қазақстан және Солтүстік Қазақстан облыстарының әкімдіктері шығарған облигацияларды 22,5 миллиард теңгеге сатып алды.