Биыл Ұлытау облысында жылу беру маусымына әзірлік жұмыстарына 36 млрд 600 млн теңге бөлінді, деп хабарлайды 24kz.

Бұл қаржыға жүзден астам шағын жылу көздері мен мың шақырымға жуық инженерлік желі жөнделді. Бұдан бөлек, Жезқазған мен Сәтбаев қаласындағы жылу орталықтарында негізгі жабдықтар жаңартылып жатыр. Қазір жоспарланған жұмыстың шамамен 75%-і аяқталды.

Жезқазған жылу электр орталығы өткен маусымды сәтті өткерді. Дегенмен, 40-қа жуық екінші деңгейлі технологиялық ақау тіркелді. Кәсіпорын директоры қазір сол кемшіліктерді жою мақсатында ауқымды жұмыстар жүргізіліп жатқанын айтады. Одан бөлек, орталықтағы 8 қазандықтың біреуінде жаңғырту жұмыстары және тағы екеуінде күрделі жөндеу жүріп жатыр.

Ермек Жұмақанов, жылу электр орталығының директоры:

- Қазіргі таңда біз 70%-ке жөндеу жұмыстары жұмыстары аяқталды. Енді 1-1,5 айдың ішінде толық аяқтаймыз. Жылу маусымына 6 қазандықпен шығамыз.

Сала мамандарының сөзінше, Сәтбаев тұрғындары да алдағы қыстан қысылмай шығуы тиіс. Себебі, биыл мұнда жарты ғасыр жөндеу көрмеген магистралдық желілер жаңартылып жатыр. Сонымен қатар жылу орталығында 2 қазандық күрделі, тағы 2-еуі ағымдық жөндеуден өтуде. Жыл соңына дейін жететін отын қоры жасақталған. Жылу маусымына дейін қазандықтардан ауаға тарайтын зиянды қалдықтарды сүзетін эмульгаторлар орнатылады.

Айдос Ақанов, Сәтбаев жылу станциясының учаске басшысы:

- Ағымдағы жөнжеу жұмыстарын біз 2-3-ші қазандықтарда жүргізіп жатырмыз. Қазіргі уақытта 70% біздің жұмыстарымыз атқарылды. Бізге материалдарымыз уақытылы келіп жатыр. Бүкілі бар біздің жұмыс атқаруымызға. 15 қыркүйекке дейін толықтай аяқтаймыз.

Облыста 100-ден астам ірілі-ұсақты жылу қазандығы бар. Олардың барлығы алдағы маусымға дайындығын пысықтап үлгерген. Жалпы биыл тартылған инвестициямен қоса есептегенде жылу беру маусымына әзірлік жұмыстарына 36,6 млрд теңге жұмсалды.

Нариман Мағауия, облыстық Энергетика және ТҮКШ басқармасының бас маманы:

- Әлеуметтік нысандар, спорт, денсаулық сақтау, мәдениет нысандары кешенді түрде дайындалуда. 1429 көпқабатты тұрғын үйлердің 957-сі қазіргі таңда толықтай дайын. Жалпы облыс бойынша бізде 1675 әлеуметтік нысан бар. Оның 1260-ы дайын.

Жезқазғанда тұрғын үй құрылысы қарқын алған соң қаланың батыс бөлігінде жылу жетіспеушілігі туындады. Мәселені шешу үшін газбен жанатын шағын қазандық салынуда. Оған осы аудандағы көпсалалы аурухана, спорт мектебі секілді бірнеше ірі мекеме қосылмақ.

Авторлары: Елдос Кәкенов, Нұрдәулет Аманкешов, Гүлшаһира Серекбаева