Анар Зинұрбек Шыңжаң өлкесінен марапатқа ие болған екі жазушының бірі болды.

Қытайдың Шыңжаң өлкесінде тұратын қазақ жазушысы Анар Зинұрбекқызы "Алты жүз шақырым: сапар жолында" атты эсселер жинағымен Бинь Син атындағы мемлекеттік әдеби сыйлыққа ие болды, деп жазды Қытайдағы Тяньшань сайты.

Басылымның жазуынша, Анар Зинұрбекқызы эсселерінде туған жер табиғатын, отбасылық құндылықтарды, ұлттық тағамдар мен күнделікті тұрмысты тақырып еткен.

"Анардың эсселері қазақтың далалық әніндей әуезді де әсерлі, шөптің иісі мен бұлттың жұпарын сездіреді", – деп баға берді қазақ жазушысының эсселеріне қытайлық белгілі жазушы Лю Лянчэн.

Анардан бөлек, бұл марапатқа Тан Синьюн де ие болды. Оның шығармасы "Бұлт үстіндегі ауыл" деп аталады.

Айта кетейік, "Бинь Синь" эссе сыйлығы Қытай эссе қоғамы тарапынан 2000 жылы әйгілі жазушы Бинь Синь ханымның өсиеті негізінде құрылған. Бұл марапат эссе жанрында үздік жетістікке жеткен жазушыларды анықтап, әдебиеттің дамуына үлес қосу мақсатында беріледі. XI "Бинь Синь" эссе сыйлығы (2023–2024 жылдар) 2025 жылдың 1 наурызында басталып, ұйымдастырушыларға 756 жеке эссе мен 339 эссе жинағы келіп түсті.

Оқи отырыңыз:

• Қазақстандық жас ақын-жазушылар президенттің арнаулы әдеби сыйлығына ие болды
• Самарқанд мемлекеттік университетінде қазақ тілі мен әдебиеті бөлімі ашылды