"Өз жерінің елшісі" форумына әлемнің бірнеше елінен мәдениет, ғылым және әдебиет өкілдері қатысты.

Алматыда көрнекті ақын, қоғам қайраткері, Олжас Сүлейменовтің 90 жылдық мерейтойына арналған "Өз жерінің елшісі" атты VII халықаралық Еуразия мәдениеттерін жақындастыру форумы өтті, деп хабарлайды inbusiness.kz сайты.

Іс-шараға Қазақстан, Франция, Ресей, Әзербайжан, Түркия, Қырғызстан, Тәжікстан, Өзбекстан, Қытай, АҚШ және басқа да елдерден келген мәдениет, ғылым және әдебиет қайраткерлері, халықаралық ұйымдар мен қоғамдық институттардың өкілдері қатысты.

Форумның пленарлық отырысында ҚР Премьер-министрінің орынбасары – Мәдениет және ақпарат министрі Аида Балаева Мемлекет басшысының құттықтауын жеткізіп, Олжас Сүлейменовтің ұлттық мәдениетті дамытуға және Қазақстанның халықаралық беделін нығайтуға қосқан үлесін атап өтті.

"Мемлекет басшысы Қасым-Жомарт Тоқаев Олжас Сүлейменовті мерейтойымен құттықтап, шығармашылығы мен азаматтық ұстанымын жоғары бағалады. Президентіміз атап өткендей, Олжас Сүлейменовтің өмір жолы — Отанға адалдықтың, жоғары азаматтық ұстанымның және жалпыадамзаттық құндылықтарға берік болудың жарқын үлгісі. Еліміздің тарихында ақындық қуат, ғылыми ізденіс, азаматтық батылдық пен халыққа адал қызмет секілді қасиеттерді бір бойына тоғыстырған тұлғалар көп емес. Олжас Сүлейменов – сондай сирек жаратылған қайраткерлердің бірі. Оның шығармашылығы қазақ әдебиетінің ғана емес, әлемдік руханияттың да жарқын құбылысына айналды. Бірнеше буынның дүниетанымын қалыптастырып, ұлттық намыс пен туған жерге деген сүйіспеншілік сезімін бойға сіңірді", – деді Үкімет басшысының орынбасары.

Форум барысында жазушының әдеби, ғылыми және қоғамдық қызметі кеңінен талқыланды. Сондай-ақ оның шығармаларының әлемнің 30-дан астам тіліне аударылғаны және көптеген елде жарық көргені айтылды.

Іс-шара аясында қайта басылып шыққан Аз и Я, Посол своей земли, "Ол жас – он молодой", "Книга поэм" және өзге де еңбектердің таныстырылды. Сонымен қатар жыл соңына дейін ақынның мерейтойына арналған жаңа фотоальбомдар шығару жоспарланып отырғаны хабарланды.