Атырауда тәулігіне 50 мың текше метр су тазартатын станция іске қосылды, деп хабарлайды 24KZ. Жаңа нысан облыс орталығы мен Мақат, Доссор кенті тұрғындарын ауызсумен қамтамасыз етеді. Атырауда 4 станция 1939 жылдан үзіліссіз жұмыс істеп тұр. Одан бері қала аумағы кеңейіп, халық саны артты. Сондықтан жаңа жоба қала мен іргелес елді мекендердің өзекті мәселесін шешуге мүмкіндік береді.

Аталған станцияны іске қосқаннан кейін Атырау қаласына тәулігіне қосымша 50 мың текше метр ауызсуы беріле бастады. Осы саладағы озық технологияға негізделген қондырғылардың басты артықшылығы өзеннен алынған су кері құйылмайды. Өңделіп, қайта кәдеге жаратылады. «Бұл алдымен Жайықтың экологиясына, суды үнемдеуге мүмкіндік береді», – дейді мамандар.

Жеңіс Елмағамбетов, №5 су дайындау станциясының басшысы:

- Қазір жағада 2 сорғы іске қосылды. Сүзу станциямыз, 6 тұндыртқыш, 10 фильтр, сосын үш 10 мың м3-тан таза су сақтайтын қазанымыз бар. «Обратный промывной ввод» деген станциямыз бар. Су кері тазартылып, станцияға берледі.

Қазір станция қажетіне қарай тәулігіне 30 мың текше метр су беріп тұр. Жаз айларында 60 мыңға дейін көтеруге мүмкіндік бар. Станцияға берілген өзен суы осы жерде тұндырылып, түрлі химиялық өңдеуден өткізіледі. Сынамалар орталық зертханаға жіберіледі.

Айжамал Азаматова, зертхана қызметкері:

- Біз судың хлорын тексереміз. Түсін, температурасын, лайлылығын, құрамындағы ауыр металдардың мөлшерін тексереміз. Бізде 30 параметрге үлкен зертханада жұмыс жүргізіледі. Оны сағат сайын тексеріп, жоғарыға беріп отырамыз.

Ендігі мәселе – тазартылған суды тұтынушыға жеткізу. 2023 жылға дейін қала іргесіндегі ауылдарға су жетпей қалатын. Құбыр бойындағы қысымның төмендігінен тұрғындар тірлік нәрінен таршылық көрді. Қазір диаметрі кең жаңа құбырлар тартыла бастады.

Орынғали Хасан, мердігер мекеменің өкілі:

- «Жұмыскер-1» ықшамауданында қазіргі таңда көшелерге 34 км су құбыры жүргізілді. Диаметрі 160 мм басталатын 110-дық құбырлар бар. Одан басқа, тұрғындардың өздеріне «подводящий» 32-лік құбырмен ауласына дейін жеткізіп беріледі.

Қала тұрғындары тәулігіне 120 мың текше метр шамасында су пайдаланады. 4 су тазарту станциясының алғашқысы 1939 жылы пайдалануға берілген. Қалғандары да 50-60 жылдан бері үзіліссіз жұмыс істейді. Енді осы ескі қондырғылар біртіндеп ауыстырылады.

Мейірім Қалауи, «Атырау су арнасы» МКМ директоры:

- Бұдан бөлек, біз қазіргі таңда 6-шы су сүзу станциясының жобасын жасақтап жатырмыз. Ол осы жаз айында мемлекеттік сараптамадан өтіп, жылдың аяғына дейін құрылыс жұмыстарын бастау жоспарланып отыр. Ол тәулігіне 60 мың текше метр су береді.

Осылайша облыс бойынша ауызсу мәселесі біртіндеп шешіле бастады. 2023 жылы Құрманғазы, Исатай аудандарын тірлік нәрімен қамтитын. «Қиғаш-Маңғыстау» ауызсу құбырын жүргізу жұмыстары басталды. Оның құрылысы келер жылы аяқталуы тиіс. Ал Қызылқоға ауданындағы 7 ауылдық округке «Тайсойған» жерасты су бассейнінен құбырлар тартыла бастады.

Авторлары: Арыстанбек Кенже, Айбек Байзақов, Жандос Рахметуллин