Өскемен қаласында Ұлттық ұланның «Шығыс» өңірлік қолбасшылығына қарасты 5518 әскери бөлімінің әскери қызметшілері полиция қызметкерімен бірлесіп, травматикалық тапанша алып жүрген жасөспірімді ұстады, деп хабарлайды Egemen.kz.

Назарбаев даңғылы бойында әскери жасақтың назарына күдік тудырған жас жігіт ілігеді. Құжаттарын тексеру барысында ол тұрғын үйлердің аулаларына қашып жасырынбақ болды. Алайда әскери қызметшілердің жедел қимылы мен дайындығының арқасында жасөспірім дереу ұсталды.

«Полиция қызметкерлерімен бірге жүргізген тексеру кезінде оның сөмкесінен тапанша табылды. Қашуға тырысқанымен, ол жауапкершіліктен құтыла алмады», деді әскери жасақтың бастығы қатардағы Аян Асхатов.

Ұсталған азаматтың 2008 жылы туған жергілікті тұрғын екені анықталды. Ол өзімен бірге травматикалық қару алып жүргенін мойындады. Жасөспірім тиісті шешім қабылдау үшін Ертіс полиция бөліміне жеткізілді.