Ташкентте Абай күніне арналған мәдени бағдарламалар легі екі ел өнерпаздарының қатысуымен өткен гала концертпен қортындыланды.

Өзбекстанның академиялық драма театрында ұйымдастырылған кешке келген халықтың қарасы көп болды. Сахнада Абай шығармалары орындалып, қос елдің мәдени өнері таныстырылды.

Өзбек музыканттары академиялық драма театрға жиылған халықты кернейлетіп қарсы алды. Бұл аспап жаугершілік заманда атой шақырып, дабыл қағып, хабар таратқан кезде қолданған. Ал қазір үлкен жиындар мен дүбірлі тойларды кернейсіз өткізбейді.

Икрам Хашимжанов, Қазақстан өзбектері «Достық» қауымдастығының төрағасы:

- Абайдың шығармаларын әрбір қазақстандық емес, өзбекстандықтардың да біліп жатқанын көріп қатты қуандық. Былтыр Астана қаласында Әлішер Новаиға ескерткіш қойылды. Бұл түркі халықтарының бірігуіне алып келеді. Осы жақтағы Абайдың ескерткішіне де өткен сайын қараймыз. Екі елдің ынтымағы бұзылмасын деген ой.

Абай күніне арналған концертке Ташкент қаласының қонақтары мен тұрғындары жиылды. Әсіресе жергілікті қазақтар рухани кештің болатынын естігенде жылдам келуге асыққан.

Гүлназ Мырзасейітова, Ташкент қаласының тұрғыны:

- Балалардың білім алуына, мектепте де өзіміз талай оқулықтарын қолданып, Абай атамыздың өлеңдерін жаттап өскенбіз ғой. Абайды білмейтін қазақ жоқ деп ойламын. Қазақ пен өзбектің достығы дами берсін. Осындай әдемі жиындар бола берсін.

Өзбекстандағы қазақ мәдени орталығы қыркүйек айында қазақ мектептері арасында Абай күніне арнап жыр мүшәйраларын өткізуді жоспарлап отыр.