Биыл Абай облысында 38 энергетикалық нысанға жөндеу жүргізіледі.

Қазір KEGOC компаниясының мамандары жоғары кернеулі желілер мен қосалқы станциялардың техникалық жағдайын жақсартып жатыр. Аптап ыстық, жауын мен желге қарамай жүргізілген жұмыстың нәтижесінде жоспардың 61 пайызы орындалды дейді мамандар.

Семей-500 қосалқы станциясы 2016 жылдың желтоқсанында іске қосылған. Абай облысымен қоса Шығыс Қазақстан өңірін де электр қуатымен қамтамасыз етеді. Жұртшылыққа электр жарығын үздіксіз жеткізіп отыру үшін желілерді күтіп баптаумен 18 маман айналысады. Қазір олар қыстың қамына кірісті.

Қанат Мүбәраков, KEGOC АҚ "Шығыс ЖЭТ" филиалының Семей аумақтық электр тораптары басшысы:

- Қысқы уақытқа техникалық жұмыстар, жөндеу жұмыстарын атқару біздің міндетіміз. Қазіргі уақытта Семей 500 қосалқы станциясында УШР фаза С-сында жөндеу жүріп жатыр. Бұл жұмыстарды жоспармен осы айдың аяғына дейін жоспарланған.

2025 жылы Абай облысындағы 38 энергетикалық нысанға жөндеу жүргізу жоспарланған. Бүгінге дейін жұмыстың 61 пайызы, яғни 23 нысанда орындалды. Оның ішінде қосалқы станциялар, электр беру желілері, арнайы көліктер және бірнеше қызметтік ғимарат бар.

Сұңқар Тәменов, KEGOC АҚ "Шығыс ЖЭТ" филиалы бас инженерінің орынбасары:

- Қазір кернеу қуаты 500 кВт және 220 кВт болатын электр желілері мен екі қосалқы станцияда жөндеу мен техникалық қызмет көрсету жұмыстары қалды. Сондай-ақ арнайы техникамыз бар. Оларды да тексеріп, қысқа дайындаймыз. Мұның барлығы жыл сайынғы жөндеу жоспары аясында іске асып жатыр.

Қазір мамандардың жұмысы қызу. Себебі жылыту маусымы жақындап келеді. Жоспар бойынша жөндеу жұмыстарын 1 қазанға дейін аяқталуы тиіс.

Талғатбек Әбдіқожа, Ботагөз Дандыбаева, Медет Өмірханов