Анасы жоғалған баласын өз бетінше жарты сағат іздегенімен, іс-әрекеті еш нәтиже бермеген.

Сондықтан да, жедел түрде полицияға жүгінуге мәжбүр болған, деп хабарлайды inbusiness.kz сайты.

Оқиға Абай облысындағы шалғай ауылдардың бірінде тіркелген. Онда 7 жастағы ерекше бала үйінен белгісіз бағытты бетке алған.

– Таңғы сағат 10:09-да "102" арнасына аутизм диагнозы бар баланың жоғалғаны туралы хабарлама түсті. Әйелдің айтуынша, ұлы таңғы 9:30 шамасында үйден шығып кетіп, із-түзсіз жоғалған. Өзі іздеп таппаған, – деп хабарлайды Абай облысының полициясы.

Полиция хабарламадан соң дереу баланы іздеуге кіріскен. Сағат 11:40 кезінде ювеналды полиция қызметкерлері, яғни полиция капитаны Нұрғиса Бектасов пен полиция лейтенанты Темірлан Төлеуғазин баланы ипподром маңынан, үйінен шамамен екі шақырым жерден кездестірген.

– Ерекше бала болған соң, оны шошытып алғымыз келмей, жай ғана қолымды ұсынып, шақырдым. Бала бірден мойныма асыла кетті. Ал, көлікке мінген соң әріптесім оған мультфильм қосып беріп, біз анасына қарай бет алдық, – дейді полиция капитаны Нұрғиса Бектасов.

Полиция қызметкерлері ұлын көрген кезде анасының көз жасына ерік бергенін айтады. Әрі ол өміріндегі ең ауыр сағаттарды бастар өткергенін жеткізген.