Қарағанды облысының Абай қаласындағы тігін фабрикасы жұмысшылар санын 500-ге дейін жеткізуді жоспарлап отыр. Өңірдегі зауыттар мен кеніштерге жұмыс киімдерін тігіп келген кәсіпорын қазір қарапайым адамдарға да киімдер шығарады. Фабриканың бұл бағыттағы жетістіктерімен Мәжіліс депутаттары, AMANAT фракциясының мүшелері Бауыржан Смағұлов пен Арман Қалықов танысты. Халық қалаулылары ұжымға отандық тауар өндірушілердің бірыңғай реестрі жөніндегі заңды түсіндірді.

Фабрикада 100-ге жуық адам еңбек етеді. Ұжыммен кездескен Мәжіліс депутаттары отандық тауар өндірушілердің бірыңғай реестрі туралы заңды түсіндіріп берді. Енді осы құжат негізінде тауар өндіруші кәсіпорындардың тізімі жасалып, олардың жұмысы шикізаттан дайын өнімге дейін бастан-аяқ бақылауда болады. Бұл жасандылықты жойып, еліміздің нақты өнеркәсіптік әлеуетін айқындауға мүмкіндік береді.

Бауржан Смағұлов, ҚР Парламенті Мәжілісінің депутаты:

- Осы жылда Мәжілістен отандық заттар өндірісі туралы заң шықты. Ол заңға Президент қол қойды. Осы заң туралы барлығын түсіндірдік. Енді заң шеңберінде реестр болады. Мынау технологиялық процесс түгел көрініп тұрады. Жұмысы қалай, қанша тоқ, жылу пайдаланады. Қанша зат шығарады.

Фабрика 75% арнайы киім тігумен шұғылданады. Бұл облыстағы зауыттар мен кеніштердің тапсырысы. Бүгінгі таңда қарапайым адамдарға арналған киім тігуге басымдық беріле бастады. Тіпті фабрика іргесінен арнайы дүкен ашылыпты. Оған көршілес қалалардан да келіп киінетіндер бар. Кәсіпорын басшылығы фабриканы танымал ететін өнім түрін көбейткісі келеді. Ол үшін кәсіпорын шеңберін кеңейтіп, қосымша жұмысшылар алу жоспарда.

Ерқайрат Қоянбаев, киім пішу цехының меңгерушісі:

- Бүгінгі таңда спорттық киімдер, жылы курткалар тігеміз. Төсек жабдықтарын жасаймыз және де жұмысшылардың киімі бар. Жалақымыз тұрақты. Зейнетақы, медициналық сақтандыру тұрақты түрде болып жатыр.

Халық қалаулылары мұндай жеңіл өнеркәсіпті қосылған құнға салынатын салықтан босату қажет деген пікірде. Бұл туралы Үкіметке ұсыныс жасаған. «Соның арқасында жеңіл кәсіпорындардың шығыны азайтып, импортпен бәсекелестігі артады», – дейді депутаттар.

Авторлары: Руслан Нұрланұлы, Сайран Ақамбаев, Аман Хамит