Бұл туралы Маңғыстау облысының прокуратурасы мәлім етті.

Ақтау қаласында Telegram мессенджері арқылы психотроптық заттарды сататын парақшалардың жарнамасын таратып, ғимараттардың қасбеттеріне граффити салған азамат ұсталды, деп хабарлайды inbusiness.kz сайты.

Құқық бұзушы кезекті материалды жапсырып жатқан кезде полиция қызметкерлері тарапынан қылмыс үстінде қолға түскен.

Ақтау қалалық сотының 2026 жылғы 23 сәуірдегі үкімімен азамат ҚР ҚК-нің 299-1-бабы 1-бөлігі бойынша кінәлі деп танылып, 1 жылға бас бостандығынан айырылды. Үкім әзірге заңды күшіне енбеген.

Прокуратура мәліметінше, кінәсін мойындағанына қарамастан, оған нақты бас бостандығынан айыру жазасы тағайындалған.

Маңғыстау облысының прокуратурасы мұндай жазбалар есірткі құралдарын насихаттауға жататын қылмыстық құқық бұзушылық екенін ескертіп, азаматтарды күмәнді табыс көздерінен бас тартуға шақырды.