Цифрлық таңбалау жүйесін дамытудың алдағы бағыттары жуырда Мәскеуде өткен Еуразиялық үкіметаралық кеңесте талқыланды.

Алқалы жиынға премьер-министр Олжас Бектенов қатысқан еді. Онда мүдделі тараптар Еуразиялық экономикалық комиссияның ақпараттық базасындағы интеграция және таңбалау жүйесін жетілдіру, тауарлардың заңдылығы мен қауіпсіздігін бақылауды күшейту, таңбаланған өнімдердің Еуразиялық Одақтың ішкі нарығында еркін қозғалысын қамтуды қайта қарау жұмыстарын пысықтады.

Андрей Слепнев, Еуразиялық экономикалық комиссияның сауда жөніндегі министрі:

- ЕАЭО-да тауарларды сәйкестендіру құралдарымен таңбалау жүйесі толығымен қалыптасты деп айтуға болады. Келесі қадам – контрафактілік өнім айналымына қарсы тұруға бағытталған процестерді одан әрі жақсарту. Осы мақсаттар үшін бірінші кезекте тауардың қауіпсіздігін және айналымға енгізу кезінде оның заңдылығын бақылау үшін таңбалау жүйесінің рөлін күшейту қажет.