Жақында Қытайдың Шанхай қаласында дрон-футболдан өткен әлем чемпионатында Қазақстан құрамасы алғашқы бестікке енді. Осы сайыста ел намысын қорғаған қос команданың бірі толықтай оралдық өрендерден жасақталған. Айта кетерлігі, кейінгі 3 жылда Батыс Қазақстан облысында бұл спорт түрін дамытуға айрықша көңіл бөлініп, тек облыс орталығы емес, 5 ауданда авиа және дрон үйірмелері ашылған.

7 сынып оқушысы Тамырлан Төлегеннің балалардың Техникалық шығармашылық орталығына келіп әуе үлгілеу үйірмесіне қатысқанына 3 жылдан асыпты. Бастапқыда қалықтай ұшатын жеңіл ұшақтар жасаса, кейін моторлы ұшақтар құрастыра бастапты. Қазір дронға көбірек қызығады.

Тамырлан Төлеген, облыстық Балалар техникалық шығармашылық орталығының шәкірті:

- Осындай ұшақты жасау үшін бір апта керек. Оны сызу, кесу бәрі қиын. Қалғандары өте жеңіл. Мұнда ұшақты кесу, қию қиын. Оларға мотор, контроллер қымбат тұрады. Мен Алматыдағы жарыстан екінші орын алып келдім.

Ал Айдар Исатай қараша айының соңында Шанхайда өткен дүниежүзілік дрон-футбол додасына қатысыпты. Өлшемі 40 сантиметрлік дрондар арасында Қазақстан командасы 5-орынға табан тіреген. 18 елден 20 команда қатысқан жарыста біздің елдің дроншылары ең жас команда боп танылған екен.

Айдар Исатай, дроннан әлем чемпионатына қатысушы:

- Қиын болды. Өйткені Жапониядан, Кореядан, Қытайдың өзінен 2-3 мықты команда келді. Қарсыластар мықты болды, шеберлігін көрсетті. Олармен тең түстік. Бірінші өзбек бауырлармен шықтық және Сингапур елінің командасымен шықтық. Сосын Испания командасымен шықтық. Сол үш команданы асыра жеңіп, қытайлармен ¼ финалда жеңіліп қалдық.

Осы чемпионатқа дрон-футболдан қатысқан қос команданың бірі толықтай оралдық өрендерден құралуы — өңірде дрон спортының қарқынды дамып келе жатқандығының айғағы. Бүгінгі облыс біріншілігіне де Орал қаласымен қоса бес ауданнан талапты жастар жиналды. Олар бөлмешілік планерлар мен моторлы ұшақтар, микродрондар мен квадрокоптерлер санатында сайысты. Балалар биыл алғаш рет симуляторлармен де бақ сынады.

Бақытжан Мәуленов, облыстық Техникалық шығармашылық орталығының директоры:

- Дрон жарысын үйрену үшін симулятордан бастайды. Оқушылар 100 сағаттан астам симуляторға жаттығу жасайды да, артынан дрондарға көшеді. Кедергілерден өту, мына траекториямен жүру, жақсы-жақсы пилотирование үйренеді. Бұл жерде көп пилотирование өткен оқушыларымыз жақсы нәтижеге жетеді. Балдар авиацияны жақсы түсінеді, аэродинамиканы жақсы түсінеді. Сосын модельдерді құрастырады. Соның бәрін осы орталықта үйренеді.

Егер елімізде дрон спортына биылдан бастап мән берілсе, Орал өңірінде авиадронды дамытуды қолға алғанына 3 жылдан асыпты. Содан шығар, оралдық дроншылар республикалық сайыстарда үнемі үздіктер қатарынан табылып жүр.

Авторлары: Е.Жылқайдарұлы, Б. Жарылғасов, Э. Аюпов