Жастар арасында жаңа тренд пайда болды. Аста-төк тойдан жастар жаппай бас тарта бастаған, деп хабарлайды Skifnews.kz агенттігі.

Жас келіннің жазбасы мен ақылдылығына жұрт сүйсініп жатыр. Айдана Қожанова өзінің басынан өткен оқиғасымен бөлісті.

«Біз өте қарапайым той жасап үйлендік. Менде үлкен ұзату той болмады. Күйеуім 3 адам болып келді, ал біз 8 адам болдық. Кішігірім сырға салу болды», — деп жазды ол.

Оның сөзінше, тіптен қалың мал, махір дегендер де болмаған. Оңтүстіктің қызы болса да, ол ата-анасын, ағайындарын көндірген.

«Ешқандай қалың мал, жасау, киіт сияқты шығындар болған жоқ. Өзім қайнап тұрған салт-дәстүр ұстайтын Оңтүстіктің тумасымын, ештеңеге қарамай ата-анамызға өзіміздің қалауды жасаттық.

Күйеуім үйінде 40-50 адамға беташар-той есебінде өткізіп құтылдық. Ешқандай дүркіреген үлкен той болған жоқ. Артық шығын жасамай қосылдық, есесіне үйлі болдық», — деп жазды Қожанова.

Оның бұл жазбасын жастар ғана емес, ересектер де қолдап, жаппай жақсы пікірлер білдіруде.

"Өте дұрыс, өз ойы бар жастар көбейгені қуантады", "Артық кредит, киітке бола ұрыс-керіс те жоқ. Бақытты болыңдар, мұндай жастар жақсы тұрады деп сенемін", "Өте дұрыс жасағансыздар, артық шығын не керегі бар, есесіне үйлі болдыңыздар", "Біз миллион адам шақырып той жасадық. Оларды мен сол той біткесін көрмедім. Не керегі бар сол? Танымайтын адамдармен артық шығынның қажеті қанша, тумаларды жинап, осындай шынайы кішігірім той жасаса қандай керемет!" деген пікірлер толастар емес.