Киік популяциясын басқару мәселесі Мәжілісте қызу талқыланды. Мәжіліс депутаты Аманжол Әлтай бұл жөнінде өз көзқарасын білдірді, деп хабарлайды Skifnews.kz ақпараттық порталы.

Халық қалаулысы киіктерді қолға үйретіп, жыл бойы бағу туралы ұсынысты сынға алды. Оның айтуынша, бұл – киіктің табиғи ерекшелігіне сай келмейтін, жүзеге аспайтын бастама.

Киік – қоныс аударып өмір сүретін жануар. Ол қыс мезгілінде жылы жақтарға, ал жазда Батыс өңір мен Сарыарқаға оралады. Оны қысы-жазы ұстап бағу мүмкін емес. Қазірдің өзінде жылқы мен сиырға жем-шөп таппай отырмыз. Мұндай жағдайда киікті қамқорлыққа алу ақылға қонымсыз, – деді депутат Аграрлық мәселелер комитетінің кеңейтілген отырысында.

Сондай-ақ, ол Қарағанды мен Жезқазған арасындағы аумақта киіктерге арналған экокөпірлердің жоқтығына назар аударды. Жол инфрақұрылымы киіктердің табиғи миграциясын тежеп отыр.

Киіктің көші-қон жолдары нақты зерттелуі керек. Көктемде, төлдейтін кезеңде оларды мазалауға болмайды. Ал күзде, денесі толық жетілгенде ғана реттеу жұмыстарын жүргізуге болады. Киікті шілденің аптабында Арқадан басқа өңірге көшіру – орынсыз. Әр аймақта арнайы қабылдау бекеттерін ашу қажет, – деді Аманжол Әлтай.

Айта кетейік, қазір еліміздің 6 өңірінде киік қабылдауға арналған 25 мал бордақылау орны жұмыс істейді.