Жетісу облысының диқандары биыл жаңбыр сирек болғанына қарамастан жүгері бітік шығуы тиіс дейді.

Олар сонымен қатар өнімді қабылдау құнының да жоғары болатынына үмітті. Өңірде 42 мың гектар алқап жүгері егілген. Оны әсіресе Панфилов ауданының шаруалары көп өсіріп отыр.

Ұлан Сарпеков жүгері алқаптарына тамшылап суару технологиясын орнатқан. Былтыр гектарынан шамамен 20 тонна өнім алды. Биылғы түсім көлемі де сол шамада болуы тиіс. Ылғалды үнемдеу әдісін әзірге 150 гектар жерде қолданып келеді. Барлығын бірдей қамтуға қаржы тапшы.

Ұлан Сарпеков, кәсіпкер:

- Топырағы жақсы жерлерден 25-27 тонна өнім беріп жатыр. 2023 ж 50 гектар қойдым тамшылап суаруды. 2024 ж тағы жүз гектар қостым. Содан бастап егіске біз ақша салуды тоқтаттық. Өйткені мына егіске салған ақшамыз ақталмай жатыр бағаның төмен болуына байланысты.

Қайрат Әбдірақымовтың жер жыртып, жүгері егіп жүргеніне 30 жыл болған. Дәстүрлі әдіспен егуді құп санайды. Былтыр заманауи технологияларға иек артпақ болғанымен жүгерінің құны құлдырап, несие алудың реті келмепті.

Қайрат Әбдірақымов, кәсіпкер:

- 400 мың теңге кетеді бір гектарына жинап алғанға дейін еккеннен бастап. Бүкіл технологиясын сақтап еккеннің өзінде. Ал оның үстіне егерде мен 8 тоннадан дән алсам әрең дегенде себестоимостьті әрең жабады. Еңбегімізді ақтай алмай отырмыз. Ал баға көтерілсе одан бізге кішкене мотивация болатындай, еңбегіміз еленетіндей, өзімізде кішкене қалтамызда да бірдеңе қалатындай жағдай болады.

Панфилов ауданындағы 5 мың қожалықтың жартысы жүгері егеді. Екі жыл бұрын шаруалар бір келі өнімді 130 теңгеден өткізген. Былтыр қабылдау құны өнімнің сапасы мен ылғалдылығына қарай 45-60 теңге аралығында болды. Жергілікті атқарушы билік өкілдері жүгерінің қабылдау құнын биыл да нарық реттейді деп отыр.

Ермек Қонақбаев, Панфилов ауданы ауыл шаруашылығы бөлімінің басшысы:

- Конкуренция керек. Бізде қазір бір ғана айналысатын шаруашылық болса, Жаркент крахмал зауыты. Одан басқа бізде алушылар, жүгері қабылдаушылар жоқ. Содан кейін мәселенің барлығы осы конкуренцияға келіп тіреледі. Енді әкімшілік осы жөнінде жұмыс істеп жатыр. Бізге Қытайдан инвестор келуі керек болатын. "Сушилка саламыз, өзіміз қабылдаймыз" деген. Енді оның барлығы іске асатын болса жүгері өсіру бұдан әрі қарай дамиды деген ойдамыз.

Жетісу облысындағы жүгері алқаптарының ауданы 42 мың гектардан асады. Шаруалар шамамен 290 мың тонна өнім алуды жоспарлап отыр.

М.Е. Гульнар Жантасова, Олжас Байбосынов