Астананы газдандыру жұмыстары жоспарға сай жүріп жатыр.
Бүгінде 200 мыңнан астам тұрғын табиғи газға қосылды. 14 мың тұрғын үйге газ құбыры тартылды. Оның ішінде 12 мың абоненттің көгілдір отынға қолы жетті. Жыл соңына дейін Шұбар, Тельман, Кірпішті және ішінара Өндіріс пен Үркер тұрғын алаптарын газдандыру аяқталады. Бұл шамамен тағы 280 мың тұрғын газбен қамтылады деген сөз.
Көгілдір отынның шарапатын көріп отырған елордалықтардың бірі Каспий Нұркин. Зейнеткер табиғи газ келгелі бері тынысымыз ашылды дейді. Ол соңғы 3 жыл ішінде ауаның біршама тазарғанын айтады.
Каспий Нұркин, қала тұрғыны:
- Алдыңғымен салыстырғанда Іле көшесінде ғана емес, бүкіл қала бойынша көгілдір отын келгеннен кейін ауаның сапасы жақсы жағынан өзгерді. Бас кезінде мына Көктал-1, Көктал-2 ге келді. Сол жақтардан біздің көршілер газдың қандай екенін бәрі біліп алды. Газдың қандай пайдалы екенін көріп алды. Көршілер болып газды бір шешімге келіп қуана-қуана тарттырып алдық.
Шырымбек Мүшекенов, қала тұрғыны:
- Сол кезде көмір жағатынбыз. Кір жаятын болса, қап-қара кір болып тұратын. Қазір тамаша, барлығы тап-таза. Тазалығы өте жақсы. Әкімшіліктерге рақмет, қанша дегенмен қызмет жасап жатыр, еңбегін халыққа беріп жатыр, халық көріп жатыр қызығын.
Айта кетейік, елорданы газдандыру жұмыстары 2019 жылы басталған болатын. Осы уақытқа дейін газдандыру үш кезеңге бөлінді. Оның алғашқы екі кезеңі 2023 жылы аяқталды. Бүгінгі күні шаһардың 16 тұрғын алабының 11-і газдандырылды. Олар Сарыарқа, Алматы, Сарайшық және ішінара Есіл мен Нұра аудандарының еншісінде.
Мирлан Алтынбек, тілші:
- Осыдан бірнеше жыл бұрын әдетте қыс айларында Астана орталығының өзінде қолқаны қабатын тұмша тұратын еді. Ол тұмша Шұбар сияқты аудандардағы тұрғын үйлерден тарайтын. Бұдан былай мұндағы экологиялық ахуал жақсармақ, дейді әкімдіктегілер. Бүгінде Шұбар тұрғын алабында жалпы ұзындығы 33 шақырымға тең табиғи газ құбыры тартылып қойды. Көгілдір отынды әр үйге кіргізу жұмыстары осы айдың соңына дейін аяқталады.
Биыл Есіл ауданындағы Тельман және Байқоңыр ауданындағы Кирпичный тұрғын алаптарын газдандыру жұмыстарын жүргізіп, құрылысын қазан айының соңына дейін аяқтауды көздеп отыр. Табиғи газ жыл соңына таяу беріледі.
Рақымжан Алтынбек, қалалық энергетика басқармасы газдандыру бөлімінің басшысы:
- Осы тұрғын үй алаптарындағы көше бойында газ тарату желілерін жүргізу әкімшілік тарапынан. Жүргізілген желілерден тұрғын үйлерге дейін монтаждау-тарту жұмыстары, үйдің ішіндегі қазандықтары орнату және қосылу бойынша жұмыстар ол тұрғын үй иесінің міндеті. Газға қосылу үшін олар жергілікті қалалық "ҚазақГазАймақ" филиалына жүгініп, техникалық шарттар алып, монтаждау жұмыстарының жобасын жасап, қажетті құжаттамалар арқылы қосыла алады.
Сонымен қатар Үркер тұрғын алабын газдандыру да жыл соңына дейін аяқталады деген жоспар бар. Қалып отырған тағы екі тұрғын алабы Өндіріс және Қазқалашық. Жұмыстар биыл ішінара басталып, 2026 жылдың соңына дейін бітеді. Осылайша жоспар 100 пайызға орындалмақ.
Мирлан Алтынбек, Абдулхамит Бөлекбаев, Жандос Битабаров, Аружан Шуақбай
