Туризм және спорт министрлігінде жаз айларында өтетін халықаралық спорт жарыстарына дайындық мәселелері талқыланды.

Қазақстанда жаз айларында бірнеше халықаралық спорт жарысы өтеді. Бұл туралы Туризм және спорт министрлігінде өткен жұмыс кеңесінде айтылды, деп хабарлайды inbusiness.kz сайты.

Кеңесте Астана, Түркістан, Шымкент және Ақтау қалаларында ұйымдастырылатын турнирлерге дайындық мәселелері талқыланды.

Жиында спортшылар мен көрермендердің қауіпсіздігі, спорт нысандарының дайындығы, логистика, медициналық қызмет көрсету, шетелдік делегацияларды орналастыру және мемлекеттік органдар арасындағы үйлестіру мәселелеріне ерекше назар аударылған.

Астанада боччадан өтетін Әлем кубогіне 25 елдің спортшылары қатысады деп жоспарланып отыр.

Сондай-ақ байдарка мен каноэде ескек есуден Азия чемпионатына 16 елден шамамен 350 спортшы келеді. Ал таеквондодан (WT) халықаралық турнирлерге 1600-ге жуық спортшы қатысады.

Бұдан бөлек, жеңіл атлетикадан XXXV Ғұсман Қосанов мемориалына 15 елден 250-ге жуық спортшы, кураштан әлем чемпионатына 50 елден 500-ге жуық қатысушы жиналады деп күтілуде. WKF каратэден Орталық Азия чемпионатында 700 спортшы бақ сынамақ.

Туризм және спорт вице-министрі Серік Жарасбаев халықаралық жарыстарды жоғары деңгейде өткізудің маңызын атап өтті.

Оның сөзінше, мұндай ірі турнирлер Қазақстанның халықаралық спорт аренасындағы беделін арттырып, спорт инфрақұрылымы мен бұқаралық спорттың дамуына серпін береді.